بيت بابا وماما…

وهيفضل اليوم اللي البنت المتجوزة مننا بتروح فيه لأهلها هو أجمل يوم في الأسبوع كله..

اليوم دة البنت مننا بتحس انها لِسَّه ليها قيمة.. بتحس انها محبوبة كدة ومتدلعة.

اليوم دة البنت مننا بتلاقي الإحساس اللي هي طول الاسبوع مفتقداه وهو ان فيه حد بيقدملها حاجة مش مجرد بيتاخد منها وبتدي بس!

اليوم اللي البنت المتجوزة بتروح فيه عند اهلها بتحس بأمان بتنام بجد بتنام من غير ما تفكر "ها هطبخ بكرة ايه" و "ها هفطرهم بكرة ايه" دة كفايه انها بتنام من غير ما تفكر باب الشقة مقفول ولا لأ.

البنت المتجوزة مننا لما بتبقي عند اهلها مش بتتبسط لمجرد انها مرتاحة ومبتطبخش لأ بتبقي مبسوطة انها حاسة انها لِسَّه ليها طلبات بتتحقق وانها مش مجرد بتحقق 

لغيرها طلباتهم وطلباتها اللي بتختذلها في "كوباية شاي" حتي مبتلحقش تشربها!

البنت المتجوزة مننا بتحس انها انسانة لِسَّه عايشة بمجرد ما تقضي يوم وسط اهلها وتلاقي مامتها محضرة لها الغدا وتلاقي باباها انه لما يلاقيها راحت في النوم قصاد التلفزيون انه غطاها وقفل التلفزيون والنور وسمعت مامتها بتنبه علي البيت كلة انه يوطي صوتة عشان

هي نامت! 

البنت المتجوزة مننا هيفضل أسعد يوم في عمرها وأسعد وقت هو الوقت اللي بتقضية عند أهلها.

والله العظيم اليوم اللي البنت المتجوزة مننا بتقضية عند اهلها مش زي ما الناس فاكرة اننا بنروح عشان نرتاح من الغسيل والطبيخ وعشان نكبر دماغنا من المسؤوليات وننام براحتنا ابدا والله! اليوم دة بيغسلنا وبيودي من جوانا أي قرف او وجع.. بيسكن ألم احساس اننا ملناش لازمة غير اننا ندي للي حوالينا من غير ما يبقي مسموح لنا نطلب..

اصعب حاجة اي بنت متجوزة بتحس بيها هو انها مبقاش ليها مساحة تطلب.. وان كل اللي متاح ومسموح لها بيه انها تنفذ وبس..

ربنا يخلي لكل بنت متجوزة اهلها لانهم حقيقي والله العظيم مصدر السعادة والطاقة اللي بتخلينا احنا البنات المتجوزين نقدر نكمل ونفضل محافظين علي بيتنا.