"فيصت".. شريف عامر يحكي تجربته مع مقلب الغسالة في برنامج "رامز نيفر إند"

كتب- محمد أبوالمجد:

قال الإعلامي شريف عامر، إن البعض اختلط عليه الأمر في حديثه بالأمس مع النجم رامز جلال، حول كونه أول ضحايا حلقة برنامج "رامز نيفر إند" والذي يُذاع خلال شهر رمضان على فضائية "إم بي سي مصر"، قائلًا: "أنا مكنتش ضحية من ضحايا رامز، لكني التجربة اللي بيجربوا فيها قبل ما يقابلوا أصدقاء وضحايا رامز جلال".

وأضاف "شريف" خلال تقديمه لبرنامجه "يحدث في مصر" على فضائية "إم بي سي مصر" اليوم الخميس: "كل سنة بروح يجربوا فيا والسنة دي أنا أخدت مفتاح واحد من لغز المقلب من حد من الزملاء، قالي يا أستاذ شريف أقلع النضارة قبل ما تدخل الأوضة"، موضحًا: "محدش قالي المقلب وروني الأوضة وقلت في نفسي احتمال الأرض هتفتح مرة واحده أو في مياه تحتي، ومجاش في دماغي موضوع الغسالة ولا رامز ولا حد رضي يقولي حاجه غير إني دخلت أوضة لطيفة وخلاص ورامز قالي تعالى ندخل نتكلم هنا ومحدش غششني أي حاجه".

وتابع: "أنا دخلت الأوضة وأعجبت بنفسي رغم إني فيصت طبعًا بس عافرت، بس قلت أول ما أفهم ايه بيحصل هقلد رامز وهعمل زيه بالظبط، وفشلت وقلت همسك مخدة هحطها في وشي عشان لما اتقلب تحميني، بس منفعتش لأني مكنتش أعرف أن الغسالة دورتين عكس الاتجاه".

وأردف: "اللي معجب بيه في الضحايا أنهم قادرين يقوموا ويتخانقوا مع رامز أنا كنت عمال أكشف على نفسي لما كان رامز بيكلمني، وكنت بحاول أتأكد أن ضهري سليم مفيش عضمة طرقعت أو رجل اتكسرت وهو عمال يتكلم وأنا مش معاه أساسًا".