"الضحايا لازم يدعولي".. شريف عامر يعرض تجربته مع مقلب الغسالة في برنامج "رامز نيفر إند"

كتب- محمد أبوالمجد:

عرض الإعلامي شريف عامر، تجربته مع مقلب الغسالة في برنامج "رامز نيفر إند" والذي يُذاع خلال شهر رمضان على فضائية "إم بي سي مصر"، قائلًا: "كل فريق الإعداد خونة محدش غششني أي حاجة، ومقالوش ليا غير أقلع النضارة قبل ما تدخل الأوضة".

وقال "شريف" خلال تقديمه لبرنامجه "يحدث في مصر" على فضائية "إم بي سي مصر" اليوم الخميس: "أنا كنت التجربة اللي بيعدلوا عليها، يعني في الحلقات المذاعة في رمضان هتلاقي في شلت محطوطة على الحيطة دي أنا كنت السبب فيها بسبب الخبطتين اللي أخدهم لأن تجربتي مكنش فيها شلت على الأرض والحيطة".

وتابع: "الضحايا اللي راحوا في حلقات رامز نيفر إند يدعولي"، موضحًا: "رامز كان بيقول كفاية بس عمال يلعب، هو عاملني بقسوة وكانوا بيجربوا فيا المكنة هتوصل لغاية فين".

وأردف: "مش هقدر أتكلم على أي حاجه ليها علاقة بالمقالب بتاعت رامز، لأنه ماسك عليا تسجيلات صوتية، وكل سنة وأنتوا جميعًا وبخير".