فلما استحكمت حلقاتها!

أوقات كتير تمر على الإنسان يشعر فيها بأن الحياة ضاقت أكثر من خرم الإبرة .

بتمر الأوقات دي ببطء شديد، الثواني كأنها بتزحف زي سلحفاة عندها 100 سنة، ليل حالك السواد وفجر مش باين خيوطه .

في اللحظات دي الإنسان بينسى إن الفرج قريب منه جداً، وبينسى كمان إن الألم مؤشر جيد للحياة، والدليل إن الأمراض المستعصى علاجها تصيبنا بمكر من غير ألم عشان كدا بنسميها خبيثة .

الإنسان في الفترات العصيبة دي بيكون مخنوق ومش قادر حتى يسمع كلمه واحدة عن الفرج اللي هو مش شايفه ولا حتى سراب، ومهما قلت له اصبر؛ لأن أحلك لحظات إظلام الليل هي اللحظات اللي تسبق شروق الشمس، مش هيصدقك، وكمان ممكن يقول لك إنك عشان على البر فمش شاعر به، أو يقول لك، ما بيحسش بالنار إلا إللي كابشها ...

اعذره وما تزعلش منه؛ لإن مش كلنا ممكن نصبر صبر جميل، وجميل الصبر مش إننا نعيش المشكلة والهم وبس ونقول أدينا صابرين!

الإيمان ثم الإيمان بالفرج القريب.. إيمان إن النهاية جميلة، فجميل الصبر مش في أوقات الانتظار؛ لأن مفيش حد من البشر العادي ممكن يكون بيحب إنه يعيش في مشكلة ويقول إن الوقت اللي بيمر عليه جميل .

جميل الصبر في نتائجه، جميل الصبر في عائد الصبر، عائد الصبر هو اللي جميل، والأمثلة كتير جدًا لناس صبرت بإيمان في الفرج، صبرت على مشاكل وهم كبير، والعائد أو النتايج مهما اتأخرت، ففي النهاية فرجت من وسع ...

- كولونيل ساندرز (مؤسس سلسلة مطاعم عالمية).

رجل من أسرة فقيرة جداً عمل في حياته باجتهاد في مجالات كتير، لكن للأسف سوء الحظ فضل ملازمه حتى بعد ما ترك المحاماة والجيش واتفرغ للطبخ، ومش كدا وبس، لأ دا حتى مع اكتشافه خلطة سرية للقلى بدون زيت الطبخ إلى أن وصل لسن 73 سنة وبعدها انطلق في النجاح ووصل عدد محلات سلسلة المطاعم لأكتر من 600 فرع.

- ليونيل ميسي لاعب كرة قدم أرجنتيني

يلعب حالياً في نادي برشلونة، حقق الكثير من الأرقام القياسية في تسجيل الأهداف وفاز بجوائز فردية في طريقه إلى التَّميُز العالمي بكونه واحدًا من أفضل لاعبي كرة القدم.

ميسي كان أقصر قامة بشكلٍ ملحوظ من معظم الأولاد اللي كانوا معاه في نفس سنه. في نهاية المطاف تم تشخيص حالة ميسي من الأطباء بأنه يعاني من نقص هرموني أدى إلى حدّ نموه.

قرر والدا ميسي أن ابنهما يخضع لنظام حقن ليلي بهرومونات النمو، وأمضى أغلب وقته مريضًا في البيت، ولكنه تخطى بشكلٍ سريعٍ محنته، وفي نهاية المطاف نما ميسي ليصبح طوله 170 سنتيمتر .

الإيمان بالله والثقة بأنه لا يمكن أن يتخلى عنكَ هو الطريق الوحيد والأكيد للنجاة من كل مشكلة وضائقة.

ولرب نازلةٍ يضيق بها الفتى – ذرعًا وعند الله منها المخرج

ضاقت فلما استحكمت حلقاتها -- فرجت وكنت أظنها لا تفرج