بالصور.. 60 ألف جنيه تنقذ الطفلة مريم من الموت.. ووالدها:"أجيب منين"

الشرقية – فاطمة الديب:

"لو عندي حاجة ينفع أبيعها والله ما أتأخر لحظة.. بنتي بتموت قصاد عيني ومش قادر أعمل حاجة.. مريم محتاجة 60 ألف جنيه علشان تتعالج لكن ما باليد حيله".. بهذه الكلمات حاول "مدحت سليمان معوض" عامل باليومية، من قرية بندف بمنيا القمح بمحافظة الشرقية، سرد تفاصيل مآساته مع مرض ابنته ذات الأربع سنوات.

وقال والد مريم، لـ"مصراوي"، اليوم الخميس، إن دخله اليومي لا يتخطى خمسين جنيهًا، بالكاد تكفي مصروفات المعيشة؛ "حتى السرير اللي بننام عليه بعناه علشان علاجها.. نفسي أشوف بنتي بتلعب مع العيال في الشارع، مريم عندها ضمور في المخ أفقدها القدرة على الحركة وسبب لها عجز في الجانب الأيسر".

وبعيون أنهكتها دموع الألم، يواصل الأب المكلوم "ربنا رزقني بولد وبنت، "سيف" عنده 6 سنين، و"مريم" 4 سنوات، بنتي اتولدت طبيعي وكانت كويسة والله لحد ما وصلت 7 شهور؛ حرارتها زادت وحصل لها مضاعفات تسبب في إصابتها بضمور في المخ، ومن وقتها وهي عاجزة".

وأشار الأب المكلوم، إلى أن نجلته تحتاج علاج شهري بـ 280 جنيهًا، منوهًا بأنه عرضها على 7 أطباء مخ وأعصاب، أكدوا جميعًا على أن مريم تحتاج لإجراء عملية جراحية بتكلفة تصل إلى 60 ألف جنيهًا؛ "فوضت أمري لله، المشكلة إني مش قادر أوفر 600 جنيه، ربنا يلطف ببنتي ويحنن قلب أهل الخير علينا ويرزقنا باللي يكون سبب في علاجها".