في أول ظهور تليفزيوني.. شاب أردني يكشف تفاصيل عثوره على والدته بعد أكثر من 40 عامًا

كتب- محمد أبوالمجد:

خصص برنامج "يحدث في مصر" والذي يُذاع على فضائية "إم بي سي مصر" اليوم الثلاثاء، عن الشاب الأردني وسام والذي التقى بوالدته المصرية لأول مرة بعد أكثر من 40 عامًا.

وكشف "وسام" تفاصيل لقاءه بأمه، قائلًا: "بقالي 45 سنة مشوفتش أمي، وبدأ يشغلني موضوع والدتي لما وعيت على الدنيا وبقيت قادر اعتمد على نفسي، ومن أول ما وعيت على الدنيا كنت عايش عند جدتي وكنت عارف إني أمي مش موجودة، وكنت بسأل جدتي على أمي ولكن محدش كان بيتكلم معايا في التفاصيل، وكانت جدتي معوضاني حرماني من أمي طول السنين اللي فاتت وعائلتي أيضًا".

وأضاف: "بدأت أدور على أمي من 20 سنة وكنت ماشي في الطريق بسأل ووصيت محامين في مصر أسأل عليها، وأبويا جه شبرا سأل عليها في نفس المكان واتقال له ارجع تاني يوم ممكن ندلك عليها لكن ظروف شغله رجعته الأردن"، موضحًا: "شغال في مجال والدي عندنا شركة نقل بري".

وأردف: "أبويا رجع مصر تاني وقت زلزال 1992، وسأل بس معرفش يوصل، ولما كان يرجع الأردن كان بيقولي إنه سأل على أمي"، موضحًا: "عمتي كلمتني قالتلي لقينا أمك، وكانت لحظة وقولتلهم عايز أشوفها وبعتوا لي الصورة وبناتي متابعين وبينزلوا صور والدتي على الإنترنت".

وأوضح: "بعد معرفتي بالعثور على امي مكلمتهاش في التليفون حجزت ونزلت القاهرة تاني يوم، رغم إن عمتي كانت عايزه تعملي مفاجأة، ووصلنا المطار والحمدلله كانت المفاجأة"

وقالت والدته رضا: "مبسوطة إني شوفته طبعًا هو وزوجته الجميلة اللي شبه الأميرة ديانا، وشكرًا إنكم اهتميتوا بينا وبشكر عمة وسام إنها رجعت لي ابني".

فيما علقت الحاجة سميرة الشرقاوي: "أنا عمة الشاب الأردني وسام وهو كان عمره 3 أشهر كان بالمستشفى وحدثت ظروف بين والدته وأخي، الذي قال لها إن ابنها وسام توفي ومرت الأيام وانفصل الزوجين عن بعضهم البعض وسافرت لمصر، ونزلت من 5 سنين على مصر وأبلغت أصدقاء لي باسم والدة باسم وكنت فاكره إنها من طنطا وروحت للمركز سألت عليها، ولفت الأيام وراحت، وعمرنا ما نسينا الموضوع".

وأوضحت: "لما قابلت أصدقائي وعرفت منهم المعلومات كلمت وسام وقولتله لقينا أمك".