صبري سراج يكتب: مشكلة الأهلي البسيطة.. والحلّ المعقد

بقلم- صبري سراج: 

- مشكلة الأهلي حاليًّا بسيطة لكن حلها معقد جدًا.. مشكلة الأهلي الواضحة هي الإدارة.. مجلس إدارة ضعيف.. كل قراراته عبارة عن رد فعل ودائما رد الفعل ده متأخر... الحل معقد لأنه ببساطة مش في إيد الجماهير.. لكنه في إيد أعضاء الجمعية العمومية.. ولو عملنا انتخابات بكرة فنسبة فوز طاهر بها كبيرة جدًا.. وده لأن النادي تطور اجتماعيًّا بشكل كبير وعقود الرعاية اللي تمت وافتتاح فرع الشيخ زايد أشياء تدعم موقف مجلس طاهر بقوة.

- مجلس طاهر ضعيف، مش بس لأن رؤيته محدودة واختياراته خاطئة وفضّل إنه يدفع فواتير الانتخابات دون النظر لحجم الكوارث الناتجة عن ده، لأ.. ده لأنه كمان لأول مرة في تاريخ الأهلي نشوف مجلس إدارة بيمشي وراء الجماهير.. الجماهير مش عايزة جاريدو فيمشي.. الجماهير عايزة مبروك فيقعد.. الجماهير قلبت على مبروك فهيمشي في أقرب فرصة متاحة.

- مجلس صالح سليم ومن بعده حسن حمدي عمرهم ما أخذوا غضب الجماهير كعامل ضغط في قراراتهم وكثيرًا ما تحدوا الجماهير وأبقوا على من لا تريده الجماهير وأبعدوا من رغبت في وجودهم.. وده كان بيخلّي قراراتهم الصحيحة أكثر بكثيييير من الخاطئة.. وده اللي خلّى الكل يقول إن الأهلي أنجح مؤسسة إدارية في مصر.

- فتحي مبروك ليس مشكلة الأهلي الوحيدة.. وتحميله فاتورة الليلة كلها عبث وهطل.. لأن ببساطة المشكلة تبدأ من رأس السمكة طاهر مرورًا بمجلس ضعيف لا رأي له ولا شخصية، وكذلك علاء عبد الصادق (الدبة اللي قتلت صاحبها) وصولاً إلى معلمين زي عماد متعب ولاعبين صغار زي حسين السيد.

- أمس لم تكن أول مباراة سيئة يلعبها الأهلي أمام الزمالك.. لكن في السابق كان الأهلي يفوز لأن رأس السمكة وجسمها بحالة سليمة.. الأخطاء الفنية واردة في أي ماتش.. وعدم توفيق اللاعبين برضه وراد.. وهزيمة الأهلي أصلاً مش هي أزمته الحقيقية.. الأزمة في منظومة بحاجة للبناء من جديد.

- مرتضى منصور عمل حركة ذكية جدا السنة اللي فاتت.. مش لأنه تعاقد مع أحسن لاعبين في مصر (ودي حقيقة طبعًا) لكن لأنه فوّر فريق الهزائم بالكامل.. طرد كل اللاعبين اللي تعودوا على الخسارة في السنين اللي فاتت بغض النظر عن مستواهم الفني.. يعني حتى الكويس منهم زي عبد الشافي باعه.. ومافضلش من جيل العشر سنين هزائم غير لاعب مايتكررش اسمه ابراهيم صلاح ولاعب محتاج يثبت نفسه زي حازم إمام.... ودي حاجة أشبه بمذبحة النجوم في الأهلي في بداية الألفية لما خسر الدوري أربع سنين.. الأهلي محتاج مذبحة فنية لكنه كمان في حاجة لمذبحة إدارية وهو ده الحلّ المعقد.

- لو هنتكلم فنيًّا عن الماتش فالخطأ مكانش في التشكيل اللي الأهلي بدأ به المباراة.. لأننا كلنا توقعناه، لكنه كان في التعليمات المفقودة وفي آلية التنفيذ.. أتحدى أن أحمد فتحي يكون نازل وعارف هيعمل إيه بالضبط.

- المباراة اللي فاتت مع الزمالك.. فتحي مبروك لعب بتلاتة في الخط الخلفي عشان عارف إن دفاعه لن يتحمل سرعات هجوم الزمالك.. ليه ماعملش كده امبارح؟

- التغيير الأول في المباراة كان لازم يكون صالح جمعة مش جون أنطوي لأننا كنا بدون نص ملعب.. وعبد الله السعيد مجهوده ضاع في مكان مش مكانه.

- الأهلي لازم يعترف إنه خسر التعاقد مع لاعب أهلاوي بموهبة عظيمة زي كهربا.

- باسم مرسي أفضل مهاجم في مصر.. وكل مهاجمين مصر بعييييد عنه أوي.. أتمنى أن يستمر على الأداء الراقي ده.

- الزمالك "كوّش "على أحسن دفندرات في مصر.. خمسة لاعبين أي واحد فيهم ممكن يكون حل لمنتخب مصر مش للزمالك بس.. لذلك على الأهلي الدعم بعمرو السولية وصلاح ريكو في يناير.

- قلت سابقًا إن فتحي مبروك هيدفع ثمن دلعه للاعبين لفترة مش بسيطة، وإنه ربما ماينجحش في السيطرة على الفريق بسبب كده.. أظن دلوقتي إنه فعلاً مش هينجح في ده.

- مصر مافيهاش باك شمال بعد سيد معوض.. رحيل غير مقنع فنيًّا وحسين السيد لاعب عصبي وبحسب قول مدربه في الناشئين محمد عمارة فهو "بيحتاج دايما يتقرص" ولو اتجه الأهلي للتعاقد مع باك شمال أجنبي فده معناه إبعاد أنطوي أو إيفونا عن التشكيل الأساسي.. لذلك كريم حافظ حل مناسب على الأهلي التعاقد معه في يناير.

- مصر مفيهاش حسام غالي آخر.. لاعب تركيبته الشخصية والفنية فريدة لا تتكرر.. لاعبون كبار آخرين ابتعدوا عن تشكيلة الأهلي لفترات مثل أبو تريكة وبركات، لكن الفريق لم ينهار في غيابهم كما ينهار في غياب الكابيتانو.

- الأهلي فقد إعلامه تمامًا.. كل الإعلاميين المسيطرين على القنوات والناس بتتفرج عليهم هم الزملكاوية.. الوحيد الأهلاوي هو شوبير اللي لاعتبارات كتير الأهلاوية مابيحبوهوش لكن الطاقم الباقي كله زملكاوية ناجحين ومؤثرين بصرف النظر عن كفاءتهم المهنية.. الأهلي بحاجة لبناء منظومته الإعلامية من جديد.

المقال يعبر عن رأي الكاتب ولا يعبر بالضرورة عن رأي الموقع

للتواصل مع الكاتب اضغط هنا