أبو رجيلة عن هزيمة الزمالك من البنك الأهلي: "كله ضرب مفيش شتيمة"

كتب- محمد أبوالمجد:

علق الكابتن محمود أبو رجيلة، على هزيمة النادي الزمالك من البنك الأهلي بثلاثية نظيفة وخروجه من بطولة كأس الرابطة، قائلًا: "اللي بيحصل في الزمالك كله ضرب مفيش شتيمة".

وقال "أبورجيله" في مداخلة هاتفية لبرنامج "حضرة المواطن" على فضائية "الحدث اليوم" مساء الأحد: "عمري ما شفت لاعبي الزمالك بالمنظر دا والنادي الزمالك بالكامل غير منضبط ما بين عدم وجود رئيس النادي، وأعضاء مجلس الإدارة اللي باصين لنفسهم وكله عايز يبقى رئيس النادي"، موضحًا: "معرفش في مجلس الإدارة غير رئيس النادي واللواء علاء مقلد وجمال عبدالحميد وأمين الصندوق، وباقي الناس معرفش دخلوا النادي وبقوا أعضاء فيه إزاي".

وتابع، أن الكرة المصرية بالكامل في هبوط بالكامل، ومنتخب مصر رغم المكسب بهدفين للاشيء أمام مالاوي ولكن أداء المنتخب غريب الشكل، منتقدًا جلب مديرين فنيين للمنتخب المصري الأول والمنتخب الأوليمبي بعقود لمدة 4 سنوات رغم عدم وجود مسابقات قارية أو دولية، قائلًا: "الجوهري وحسن شحاته وحسام البدري بحالهم مقعدوش 4 سنين في المنتخب".

وأردف: "القائمين على الرياضة في مصر فطسوا المدربين المصريين وكلهم اتضربوا بالنار، وعلي ماهر الوحيد اللي شكله كويس دلوقتي وطارق العشري بيعافر".