رفضت اعتذاره.. شريف مدكور يوجّه رسالة لشخص قام بسبه على صفحته

كتب- مينا غالي:

وجه الإعلامي شريف مدكور رسالة إلى من يقومون بسب غيرهم أو الإساءة لهم، وذلك خلال فيديو عبر صفحته على موقع التواصل الاجتماعي فيسبوك.

وقال مدكور: بص حضرتك، كونك قاعد ورا شاشة الموبايل ومش عاجبك شخص وبتشتمه على الموبايل، ده ضعف منك.. أنت ممكن تنتقد شخص بكل احترام فيحترمك، ويرد عليك بكل احترام.

وأضاف: لما بصادف بعض الحالات اللي زي دي أنا ما بسكتش.. برد برضو بكل احترام، أو بمعنى أصح بهزقه بكل احترام.. حسب تربيتي.. في مدرسة الرهبان اللي كنت فيها علموني كده.

وتابع مدكور: أفاجأ ساعات بأشخاص بتكتب كلام بايخ على فيس بوك، باخد سكرين شوت وبدخل على صفحاتهم علشان أعرف كينونتهم إيه، بالاقي شخص- زي بتاع النهاردة - خريج مؤسسة دينية وطالع طالب مثالي وبيشتغل في جمعية خيرية مهمة جدا، وإحنا في شهر رمضان.. جخل كتب تعليق بايخ وأنا دخلت رديت عليه. وخدت سكرين شوت لصورته وبروفايله، والناس دخلت عملت معاه الواجب وزيادة.

وواصل: أنا اتضايقت له، لأنه وصفني بوصف مش حلو أنه يتوصف لراجل، واتضايقت له لأنه بعتلي اعتذار في الانبوكس.. يعني هو بيشتمني في العلن وبيصالحني على الخفاء.. حد تقريبا كلمه علشان يعتذر، وأنا قلت له أنا مس قابل اعتذارك وإحنا في يوم الدين هنتقابل عند ربنا وهو اللي يتصرف معايا ومعاك، وأنت دارس دين وفاهم اللي أنا بقوله.