"حاسبني في الملعب".. عمرو زكي يرد على اتهامه بأنه "كان مقضيها سهرات"

كتب- مينا غالي:

رد عمرو زكي، نجم منتخب مصر والزمالك الأسبق، على سؤال من بسمة وهبة بأنه كان مقضيها سهرات في المغرب، قائلا: أنا بحب الحياة والسهرات، لكن حاسبني في الملعب.. أولاً الصورة دي مش في المغرب، هي في مصر وبعد كأس أمم أفريقيا 2006، ومعرفش ليه نشرتها المواقع المغربية.

وأضاف: "اللي بعمله في حياتي بعمله على الواقع ومعترف بيه، وأنا براجع نفسي وبقول أنا غلطت، مانا لو عامل حاجة غلط هعملها في المداري، لكن أنا واقف وسط الناس.. أنا مقعدتش في المغرب 3 أسابيع.. الصورة الأولى أنا كنت في عيد ميلاد وبسلم على صاحبة عيد الميلاد.. أما الصورة الثانية كنت مع صحفية في المغرب ومعرفش إيه العيب فيها".

وتابع: "أما وأنا في المغرب فالكلام عن إني ضحكت عليهم فأنا كان تعاقدي بمبلغ 300 ألف دولار، ورئيس النادي أعطاني من جيبه 150 لأن أعلى قيمة مالية عندهم 150.. رجعتلهم فلوس، وكنا خارجين من أفريقيا وعندنا معسكر في أغادير وكنت هداف البطولة الودية اللي عملوها.. ولما رجعنا قبل الدوري بأسبوع بنلعب ماتش في ستاد محمد الخامس اتصابت أمام فريق برتغالي بقطع في وتر أكيليس، وقعدت مع النادي بعدها أتعالج حوالي أسبوعين وبعد كده مكانش في استجابة.. كلمنا رئيس النادي وقتها لأن كنا واخدين تاني العالم أمام بايرن ميونخ، وكان وقتها موجود في جنوب أفريقيا لتكريمه.. جالي الدكتور إيهاب علي قال لي لو معملتش عملية ممكن تمشي "تزك" على رجلك.. بعدها كلمنا رئيس النادي ماردش عليّ لأن مكانش معاه رقمي، كان موجود مكانه أستاذ طارق نائب رئيس النادي، ووقتها بعتله رسائل ماردش عليّ وعملت العملية من جيبي.. وبعتوا لي 2 من النادي رجعت لهم 150 ألف دولار".

وأضاف: "تاني يوم كلمني رئيس النادي وقالي معلش مكنتش موجود وبتعذر لحضرتك وطلع اعتذر لي على الموقع بتاعهم".