كنت بكلم منتجين مابيردوش.. أمير كرارة يكشف متى تملك منه اليأس

كتب- مينا غالى

قال الفنان أمير كرارة: "شفت كرم من ربنا ما شفتوش في حياتي.. فأنا بعد مسلسل ما حسين أن مفيش حد بيكلمني، ولا المنتجين بيكلموني، وابتديت أكلم منتجين ما يردوش عليّ، فقررت إني همشي.. مش همشي من مصر عشان مص ليها علاقة، لا مصر دي فوق دماغنا كلنا، بس همشي لأني مكنتش بعرف أعمل حاجة في مصر ساعتها غير ده.. ده شغلي ده أكل عيشي".

وأضاف كرارة خلال لقاءه ببرنامج حبر سري على قناة القاهرة والناس مع الإعلامية أسما إبراهيم: "كان لي صديق اسمه إبراهيم في لندن، وكنت بفهم في المطاعم، فقلت له ما تيجي نعمل مطعم، فقال لي في محل قدامي في المول ممكن يتعمل في المطعم، وساعتها جالي المنتج محمد عبد الحميد، منتج كلبش 1، وقالي عايزين نعمل مسلسل اسمه "2 في كلبش"- وده كان اسمه الأول- فقلت له: أنا مش عايز أشتغل.. قالي ليه.. قلتله: قافل.. وكنت عندي حالة يأس غريبة، فقال لي: طالما أنت يائس وكده كده هتمشي، ما تجرب مرة كمان وأنت مش خسران حاجة ونشوف إيه اللي ممكن يحصل".

وتابع كرارة: "ساعتها كنت مطول شعري لسه ومتمسك باللوك ده، فلقيتهم بيقولولي هتحلق شعرك وتعمل شنب فاتخضيت ومكنتش هعرف أعمل ده ولا لا."

وواصل كرارة: "عملت المسلسل وشفت كرم من ربنا نزل فجأة.. تحس زي ما بيقول: ربنا شاور.. كأنه بيقولي السنة دي مش هزعلك.. ولحد الحلقة 10 كان مسلسل كلبش محدش في العالم العربي بيتكلم غير عليه، وساعتها جالي إصرار أكمل وأشتغل على نفسي علشان أرجع تاني قوي".

​