لماذا غيّر مدحت تيخا اسمه الفني إلى مدحت إسماعيل بأعماله هذا العام؟

كتب- هاني صابر:

كشف الفنان مدحت تيخا (مدحت إسماعيل)، سبب تغيير الاسم الفني له من "تيخا" لـ "إسماعيل"، وهو ما ظهر هذا العام على تتر مسلسلي "بيت الشدة" و"رانيا وسكينة" التي يشارك بهما في دراما رمضان 2022 .

وقال مدحت، في تصريحات خاصة لـ"مصراوي": "كان نفسي أغيرها من زمان جدا، وأنا بحب تيخا أوي لأنه اسم الدلع بتاعي من صغري، ولكن أنا اسمي الحقيقي (مدحت إسماعيل) ومكتوب في البطاقة وشهادة الميلاد، وقلت آن الأوان السنة دي يبقى اسم أبويا ياخد حقه ويتخلد، وحسيت اني أبعدته من حياتي ومن شغلي وتاريخي اللي بحاول اني أبنيه، لأنه صاحب الفضل إني أكون موجود ورباني وصرف عليا في معهد التمثيل لحد ما اتخرجت ووقفت على رجليا".

وتابع: "أبويا مات وأنا صغير وأنا كنت في تالتة معهد، وجه وقت أنه ياخد حقه، وعارف أن الموضوع اتأخر كتير، وأن الناس في الشارع حابين (تيخا) ومرتبطين بيه في أعمال عمرهم ما هينسوها، زي (شيخ العرب همام)، و(خلف الله) و(يوميات زوجة مفروسة) و(البيه رومانسي)".

واستكمل: "هيعرفوا برضوا مدحت إسماعيل، لأن السنة دي عامل لنفسي كأني ببدأ من أول وجديد".

وأضاف: "(تيخا) اسم الدلع بتاعي من وأنا صغير وأصحابي كانوا بينادوني بيه، واستمر معايا (تيخا) لحد ما عملت مع محمد السبكي فيلم (آخر كلام) عام 2008، وشاف الناس بتقولي يا (تيخا) وكنت في العشرينات وقتها، وحس أن مدحت إسماعيل مش لايق عليا، فقالي هكتبك مدحت تيخا، وبعدها استمر (تيخا) معي حتى هذا العام 2022 ".
يذكر أن مدحت تيخا (إسماعيل) يشارك في دراما رمضان 2022 بمسلسل "بيت الشدة" بطولة وفاء عامر وأحمد وفيق وإيهاب فهمي ومحسن منصور ومها أحمد وأحمد التهامي وإخراج وسام المدني، ومسلسل "رانيا وسكينة" بطولة مي عمر وروبي وإخراج شيرين عادل.