"مجاش من فراغ".. نبيلة عبيد تدافع عن لقب "نجمة مصر الأولى"

كتب- محمد أبوالمجد:

دافعت الفنانة نبيلة عبيد، عن لقبها "نجمة مصر الأولى" بعد عرضه على منى زكي أو ياسمين عبدالعزيز، قائلة: "نجمة مصر دي مجتش من فراغ، جت من 98 فيلم وكل فيلم فيه شخصية مختلفة وجاية من أدباء كبار جدًا مثل إحسان عبدالقدوس ونجيب محفوظ وإسماعيل ولي الدين، والسيناريست وحيد حامد ومصطفى محرم ومحمود أبوزيد".

وقالت "نبيلة" في مداخلة هاتفية لفضائية "الحدث اليوم" مساء الأحد: "ركزت مع هؤلاء العظماء ونسيت حياتي الشخصية تمامًا، ومكنش فى حاجة قدامي غير الفن"، موضحة: "كنت بمشي في الشوارع وألاقي اسمي مكتوب الثالث أقول هيبقى الثاني ولما بقى الثاني كنت بقول هيبقى لوحده، فأنا ضحيت كتير وأديت كثير جدًا عشان اخلي اسمي زي ما هو دلوقتي".

وعن إطلاق لقب "نجمة مصر الأولى" عليها، ردت قائلة: "كان في موزع رايح للمنتج إبراهيم شوقي يشتري منه أفلام فيلم نبيلة عبيد قاله خد 10 أفلام عليهم، قالوا لا عايز فيلم لنبيلة عبيد قاله لا هتاخد 10 أفلام عليهم، ودا رسخ اسم نبيلة عبيد، واللقب معروف من زمان و معتقدش إننا ممكن نغيره لأن لازم حد يعمل تاريخ وياخد لقب تاني".

وأوضحت: "التاريخ اللي أنا عملته والتضحيات مهما أقعد أحكيلك أنا كان بيجي عليا ليالي لا أنام وأوقات في تحضير الشغل صعبة، ولما بسمع كلام عن إطلاق اللقب على أي حد تاني بسمعها كده وخلاص كلام اتقال لكن الأمر اتكرر كتير وأنا مشوفتوش وأصحابي بعتولي"، مؤكدة: "احترامي لمن قيل أساميهم دول عظام جدًا جدًا وبيشقوا طريقهم باجتهاد وبتابعهم وبتفرج عليهم".

وأشارت إلى أنها تتابع مسلسل "الاختيار3" قائلة: "بشوف إن في دور مهم معمول حلو جدًا جدًا وهو دور ياسر جلال حاجة حلوة أوي ومقنع جدًا ومذاكر تمام وبهنئ العمل كله وكل العاملين في المسلسل"، موضحة: "في عهدنا لم تكن الأجور الموجودة حاليًا كنا بنقبض بالآلاف وقتها والملايين دلوقتي بس في السنين الأخيرة دي سمعنا عنها".

وأوضحت: "سعاد حسني أكبر حاجة اخدتها على ما أذكر كانت 3 آلاف وكنا كلنا في الحدود دي منعلاش وكنا أقل من كده والملايين ممرتش عليا"، مؤكدة: "هعمل مشواري الفني ازاي بدأت وازاي كانت رغبتي أكون ممثلة سينمائية من وأنا طفلة وهحكي كل حاجه عشتها لحد دلوقتي وأنا في خدمة الفن ودا هيفيد الأجيال الموجودة"