ممكن تبقى نجمة مصر.. هالة سرحان تكشف عن رأيها في الفنانة روبي

كتب مينا غالى

قالت الإعلامية الكبيرة الدكتورة هالة سرحان، إن الفنانة روبي طلة في منتهى الجمال، وتحبها الكاميرا مثل الفنانة سعاد حسني.

وأضافت خلال الجزء الثاني من لقاءها ببرنامج حبر سري مع الإعلامية أسما إبراهيم على قناة القاهرة والناس: "في كده ناس الكاريزما بتاعتهم والنور اللي بيشع منهم يخلي الكاميرا تحبهم، وروبي اكتشفها الفنان العظيم يوسف شاهين في فيلم سكوت هنصور مع الفنانة لطيفة، والشاشة نورت لما وش روبي طلع، وأنا قلتلهم إيه البنت الحلوة دي.. دي روبي ممكن بشوية تركيز وصمود تبقى نجمة مصر على مستوى كبير لأنها اشتغلت على نفسها".

وأضافت: "لما جبتها عندي في دريم قلتلها هنعملك امتحان علشان نشوف هتنفعي مذيعة ولا لأ وهي طفلة صغيرة وحضرت هي ومامتها، وقلتلها لا خلاص هتبقي مذيعة، فهي مادة لنجمة كبيرة أوي لو استمرت في اختيارات صح، لأنها بتختار صح، وهي مُقلّة لكن بتشتغل صح، ولما عملت سجن النسا قدرت تعمل لنفسها كيان".

وتابعت هالة سرحان: "كل مسلسلاتها اختيارات صح، ولما بدأت تغني طلعها شوية من التركيز في السينما، بس هي عندها حق لأن السينما ما بقتش زي زمان، فالعالم الرقمي اللي احنا عايشين فيه أثّر، وهي بتعرف تغني وتفرفش الناس وعندها البهجة، واختارت تبقى شقية والشقاوة كلها طلعت في الغنا.. فهي موهوبة شاملة بتعرف تغني وترقص وتعمل حاجات كتير والمشوار لسه قدامها وهتبقى حاجة كبيرة في السينما المصرية."