محمد رحيم يتهم القائمين على إعلان رمضاني بسرقة لحنه.. تعرف على التفاصيل

كتب- وائل توفيق:

كشف الملحن محمد رحيم عن تعدي إعلان عُرض في رمضان 2022 على أحد ألحانه، دون الحصول على إذن مسبق منه.

وكتب عبر صفحته الخاصة بموقع التواصل الاجتماعي "فيسبوك": "وكالعادة وزي مانا متعود كل سنة ألاقي في رمضان لحن من ألحاني نازل في أحد الإعلانات او المسلسلات بدون استئذان أو تصريح مني أو من الشاعر والمرة دي الضرر كبير جدا لأنه تم سرقة لحني ووضعه في واحد من أكبر الحملات الدعائية إعلان واللي بيغنيه قطبين كبيرين من أقطاب الأغنية العربية الفنان محمد محمد منير والشاب خالد".

وتابع: "والغريبة إن النحت والاستخفاف بحقوق المؤلف والملحن خلوا القائمين على العمل يقنعوا الشاب خالد يغني جملة اللحن اللي كنت عاملها للمطرب الكبير المنافس له (الشاب مامي) من سنة 2007 يعني من 15 سنة بدون الرجوع ليا ولا لورثة الشاعر عبدالعزيز عمار شاعر الأغنية الأصلية الله يرحمه وإزاي انتوا مستخفين بالقوانين كده؟؟".

ووصف الذين سطو على اللحن بأنهم "مجردين من المهنية"، وأضاف "وازاي انتوا ناس مجردين من المهنية ومش بتحترموا ولا الجمهور ولا الزملاء ؟؟ وازاي انتوا بتسرقوا الأعمال في وضح النهار، وكأنكوا واثقين إن مفيش حد هيعملكوا حاجة ولا حد هيعاقب اللى سرق واعتدى والله العظيم حرام مجهود السنين يترمي على الأرض كده قدام عينين الواحد وهو حي يرزق إيه الاستخفاف والاستهانة دي".

وواصل الملحن: "كنتوا هتخسروا أيه لما تفهموا بتوع البنك إن انتوا مستعملين ألحان من ناس مختلفة والألحان دي ليها أصحاب وكنتوا تواصلتوا بشكل محترف ومحترم علشان تحصل على تصريح قانوني باستعمال اللحن وتعفي نفسك من السرقة يا فنان ويا جهة الإنتاج وتعفي إدارة البنك من تهمة التعدي على أعمال الناس بالعكس كان هيبقى سلوك محترم واحترافي واخلاقي!!".

وعبر عن ثقته في الحصول على حقه، قائلًا: "بس أنا واثق في ربنا سبحانه وتعالى ثم في القضاء المصري إنه هيرجعلي حقي وحق الشاعر المرحوم عبدالعزيز عمار اللى بجد أولاده أولى بفلوس أبوهم اللي شوهتوا وحرفتوا كلمات أغنيته بعد ما رحل من 10سنين، وزي ما أولاد كل حد فينا أولى بمجهود آبائهم اللى اجتهدوا وتعبوا علشان يعملوا أعمال ناجحة لسه بيتنحت فيها لحد النهاردة من أنصاف وأرباع الموهوبين والمشكلة الأكبر إن الملكية الفكرية دي بتشارك في الدخل القومي في كل بلاد العالم وبتؤثر في اقتصاديات الدول وكل العالم يعلم أهمية القوى الناعمة المصرية في شتى المجالات لكن للأسف فيه ناس لسه عايشة على سياسة القتل المعنوي والمادي للفنان والمبدع المصري حيا وميتا".

وأضاف: "وبعدين لما بتعملوا كده في اعمالي وانا عضو محترف في جمعية SACEM الفرنسية ومعايا شهادة الاحتراف الدولية وعضو عامل في جمعية ساسيرو المصرية للمؤلفين والملحنين وعضو عامل في نقابة المهن الموسيقية وأعمالي واضحة واسمي معروف الحمد لله ومسيرتي 25 سنة اومال تعملوا ايه في الملحن والشاعر اللي لسه بيبتدي وبيقول يارب أكرمني !!!؟؟؟؟".

واختتم منشوره: "إلى القضاء إن شاء الله يا أنصاف الموهوبين".

الإعلان الذي يقصده رحيم تم تقديمه ضمن حملة أحد البنوك الإعلانية، ويشارك فيه محمد منير، والشاب خالد، وجمعت الأغنية بين الفنان محمد منير، والشاب خالد، بعد 13 عاما، من الحفل الذي قُدم في أكاديمية أخبار اليوم في 6 أكتوبر.