"ابني عاش راجل ومات بطل"..والدة الشهيد إسلام مشهور عن مسلسل "الاختيار2"

كتب- محمد خميس:

علقت سوزان عبدالمجيد، والدة شهيد الواحات النقيب إسلام مشهور، على مشاهد الحلقات 25و 26 من مسلسل "الاختيار2"، قائلة: "حسيت أن راسي مرفوعة وحسيت بفخر وعزة وأن إبني عاش راجل ومات بطل وأنه مكنش في الوقت ده بيفكر في نفسه كان بيفكر في بلده كان كل تفكيره إزاي يحمي بلده وإزاي يضحي بنفسه عشانها".

ودخلت "سوزان" في نوبة من البكاء على الهواء خلال المداخلة الهاتفية لبرنامج "كلمة أخيرة " على فضائية "إكسترا نيوز" اليوم السبت، قائلة: "إبني إتصاب وماقلش " أي " وكان عاوز ينزل يكمل ودي كانت الحقيقة الحمد لله طلب الشهادة وكانت أمنيته أن ربنا يكتبهاله وربنا حققها له وهو قلي بنفسه كده وقلي ياماما نفسي أموت شهيد".

وتابعت: "لما كان بيقولي كده كنت أقوله ليه يابني توجع قلبي كان يرد ويقول : "ليه ياماما هو حد يطول يموت شهيد وكتب ده على صفحته على الفيس بوك قبيل إستشهاده"، مؤكدة: "مشاعر شبابنا كانت بتطلع من القلب ومكنوش بيخافوا وكان راجل وكلهم كانوا رجالة وحبهم لوطنهم حاجه كبيرة.

وأردفت والدة البطل إسلام مشهور، شهيد الواحات: "أنا ووالده كنا بنتفرج على الحلقة وحسينا وقت عرض الحلقة كأن الحادثة لسه حاصلة دلوقتي قدامي وتجسيد الشخصية كان صعب ولما شفت إبني قدامي إنهرت بالبكاء وقت الإذاعة لكن رغم ذلك رفعت راسي وقلت الحمد لله إبني عاش راجل ومات بطل".

وأوضحت: "اللي مأثر فينا الفراق لكن إحنا فخورين بيه وبشجاعته وتربيته لأنه إتربى على التضحية والحب والإخلاص ابوه وأخوه غرزوا فيه الحتة دي وكان نفسه يعمل حاجه لبلده وكانت حاجة مشرفه ليه ولينا رفع راسنا كلنا أبوه لما شاف الحلقة تأثر بسبب الفراق".

ووجهت الشكر على القائمين لمخرج الاختيار، قائلة: "بشكرهم لأنهم أبرزوا كافة التفاصيل وما يحدث بدقة وكأن المشاهد مش تمثيل لكنه حقيقي".