حجاجوفيتش يقدم حلولًا لوزارة الري لحل أزمة المياة الملوثة

كتبت - عبير القاضي:

قال الرحالة المصري أحمد حجاجوفيتش، إن "كل مياة الصنبور في مصر ملوثة و مليانة كلور و رملة و صدي و غيره من بلاوي تانية كتير و وزارة الصحة في مصر صرحت إن مفيش غير ١٨ شركة مياة إللي مياهم صالحة للإستخدام الآدمي، و حوالي ٤٠٪ من الفلاتر اللي موجودة عندنا في البيت بتكون مش مطابقة للمواصفات العالمية و فيها كيماويات صينية بتسبب أمراض كتيرة جداً".

وأضاف حجاجوفيتش، عبر حسابه الشخصي على موقع التواصل الاجتماعي"فيسبوك"، "أن هناك حل مثالي للموضوع ده و يقدر يساعد ملايين المصريين زي ما ساعد ملايين في العالم، سافرت السويد عشان اقابل المخترعة العبقرية السويدية "بيترا فادستروم" اللي قدرت تعمل إختراع أكتر من عظيم لتنقية المياة إسمه "سولفاتان"، أو بالعربية "مياة الشمس"، الإختراع إللي فضلت تعمل تجاربه من التسعينيات لغاية ما نجح و بقي ملقب في العالم ب"أفضل إختراع لتنقية المياة في القرن الواحد و العشرين" و اللي أخد تقريباً جميع الجوائز العالمية في سلامة المياة و البيئة، سولفاتان ده عبارة عن جركن مقسوم نصين كل نص ٥ لتر و مصنوع من مادة قوية جداً مخصوصة بتخلي الأشعة فوق البنفسجية بتاعة الشمس تدخل للمياة المش نقية اللي في الجركن و تنقيها ١٠٠٪ من كل البكتيريا و الحشرات و الميكروبات و الفيروسات، و تخليها آمنة تماماً للشرب حتي للأطفال الرضع و كل ده من غير إستخدام أي كيماويات أو كهرباء أو أي حاجة إلا أشعة الشمس المباشرة و الجركن عمره الإفتراضي من ٧ ل١٠ سنين".

وتابع الرحالة المصري قائلا: "يعني كل اللي إنت عليك تعملوا هو إنك تملي الجركن بأي مياة و لو حتى من نهر النيل على طول و بعدين تفتح الجركن في أشعة شمس مباشرة و في سنسور في الجركن بيكون لونه أحمر لما المياة تكون مش نضيفة و بعدين على حسب قوة الشمس (من ساعتين إلي ٦ ساعات) السينسور ده لونه بيبقي أخصر و بكدة تبقي المياة نقية تماماً من أي حاجة ضارة بالصحة !! يعني تشرب مياة من النيل مباشرة عن طريق الجركن ده، أنقي من مياة الحنفية".

واستكمل حجاجوفيتش، "الجميل في الموضوع إن سولفاتان دلوقتي موجود في أكتر من ٥٧ دولة في العالم و يعتبر سبب رئيسي في تراجع أعداد المرضي و الموتي في أفريقيا و المناطق الفقيرة في أمريكا الجنوبية، عشان الحكومات هناك بتشتري كميات كبيرة من الجراكن دي و تديها للمواطنين عشان توفر لهم مياة شرب نقية... ده إللي خلي الرئيس الأمريكي أوباما و الأمير السويدي و العديد من زعماء، العالم تكرم المخترعة السويدية "بيترا" و تديها أعلي الأوسمة، و الأغرب من ده كله إن ملك السويد إشتري عشرات الجراكن من "سولفاتان" عشان ياخدها معاه في أي رحلة أو زيارة رسمية للبلاد التانية و يديها هدية للملك أو الرئيس اللي بيقابلوا عشان يثبت أد إيه إن السويد كلها فخورة بالإختراع ده اللي حينقذ العالم".

واختتم كلامة متسائلا :" إيه رأيكم لو الحكومة المصرية تشتري جراكن سولفاتان و تديها لكل الناس المحتاجة في كل أنحاء مصر من النوبة إلي رفح و السلوم عشان يشربوا و يطبخوا بمياة نضيفة و كمان رجال الأعمال اللي كلهم بيقولوا بنحب مصر و نفسنا نخدمها بأي حاجة" يتبرعوا بالجراكن دي لآلاف العائلات اللي ممكن بجد جركن من ده يغير حياتهم تماماً... و أعتقد إحنا في مصر معندناش أكتر من الشمس".