أحمد الجارحي: "ذيع موهبتك" كشك هيوصلك للنجومية و"باسم يوسف" نقلة في حياتي (حوار)

حوار- محمد مهدي وإشراق أحمد:

تصوير- علاء القصاص:

أحمد الجارحي، واحد من أولياء الكوميديا الجُدد، يمكن ظهوره قليل على الساحة الفنية، لكنه مؤثر، يدين بدين المسرح، لكن خطواته الأوضح كانت من خلال "يوتيوب" والتلفزيون، أهمها شغله ضمن فريق عمل "البرنامج" واحد من أهم البرامج في الوطن العربي قبل توقفه في يونيو الماضي، بالإضافة لأعماله كمخرج في برنامج "دي سلطة"، ومسلسل "بخ"، وفيلمه القصير "150"، ومؤخرا عاد بقوة من خلال برنامج "ذيع موهبتك".

حاورنا "الجارحي" عن برنامجه الجديد، فكرته وهدفه، المحافظات اللي لفها بالكشك، أكتر المواهب المميزة اللي قابلها خلال التصوير، ورد فعله على الناس اللي صوتها وحش، والموقف الغريب اللي اتعرض له وهو بيصور في "المحلة".

اتعرفنا خلال الحوار على علاقة "الجارحي" بـ"باسم يوسف"، بداية الشغل معاه في "البرنامج" واحساسه لما اتوقف، ورد فعله على دعم الأخير لــ "ذيع موهبتك"، وأحلامه للكشك الصغير اللي بيطلع منه المواهب.

كلمنا عن برنامجك الجديد "ذيع موهبتك"؟

ذيع موهبتك هو برنامج مواهب عبارة عن كشك بيلف المحافظات، بيدور على المواهب في الشارع، بيروح لحد الناس ودا عكس برامج المواهب التانية اللي بتحتاج إن الناس هي اللي تروحلها، وبتحتاج لإجراءات وتكاليف كتيرة.

هل المواهب اللي بيعرضها البرنامج بتيجي بالصدفة ولا ده شغل إعداد؟

99% من المواهب بتيجي بالصدفة.

البرنامج بيقتصر على الغناء فقط؟

لحد دلوقتي الموسم الأول هو غناء لكن أتمنى المواسم التانية تكون غير كده.

عملت في أكثر من مجال فني -تمثيل وإخراج وبرنامج ساخر-، إيه اللي شدك لتقديم "ذيع موهبتك"؟

الفكرة من الأول كانت "ذيع أنت" اللي بدأها "شريف حسني" بكشك بيلف مصر كلها، الناس تدخل الكشك وتقول رأيها في أي حاجة. وبعدها الفكرة اتطوره لـ "ذيع موهبتك".

وبالنسبة لي تصنيفه مش برنامج مسابقات لكن هو إنساني من الدرجة الأولى، أنك توصل للموهبة وتحاول تساعدها غير أنك تفرح الناس سواء المتفرجين على الموهبة، والناس أصحاب الموهبة اللي بتبقى قاعدة بتقول هو أنا أمتى هتجيلي الفرصة، فالبرنامج ممكن وواحد في المليون يخلي حياة واحد كانت رايحة في سكة وتروح لحتة تانية خالص.

بعد مرحلة التصويت إيه اللي هيقدمه البرنامج للمواهب؟

أحنا ماشين أن كل أسبوع تكسب موهبة، تسجل أغنية في أستوديو، والـ10 الفايزين في الآخر هيكون فيه مفاجئة كبيرة جدا، بس أنا مش عارف إيه هي "يضحك".

احكلنا عن التصوير الخارجي.. غالبا بيكون فيه مشاكل مع المواطنين أو الأمن؟

الأمن مكنش فيه مشاكل ورقنا كان زي الفل، لكن المواطنين طبيعي، الناس من زمان أول ما حد يشوف كاميرا يسأل فين الأستاذ عادل إمام، حتى لو ريبورتاج بالقناة التالتة.

أحيانا بعرف أتعامل مع اللي بيرزل وأتكلم معاه ونبقى صحاب ماعدا محافظة واحدة اللي معرفتش أتعامل فيها وهي المحلة.

حصلك إيه في المحلة؟

كانت أخر حلقة في الموسم الأول، وفوجئنا واحنا بنصور بطوب بيترمي علينا، تحديدا اترمى عليا أنا، ولد بنبلة قعد يرمي عليا طوب ولغاية النهاردة نفسي أعرف ليه، بس عامة صورنا ده وهنذيعه في الحلقة.

إيه أكثر المواقف المميزة مع المواهب؟

كل المواقف مع المواهب الحلوة كويسة، ومهمتي الأساسية في البرنامج مع المواهب أني أخليها تفك لأن معظم الناس بتبقى قلقانة.. زي الطفل إسلام اللي كسب في أول حلقة وده كان أول مرة أخد حد من جوه الكشك عشان يشوف رد فعل الناس بره عامل إزاي، لأن اللي جوه بيبقى معزول عن الناس.

هل توقعت تشوف مواهب كثيرة في المحافظات؟

كنت متوقع ألاقي مواهب بس واحدة أو اتنين لكن في محافظات فاجئتني زي الزقازيق، مكنتش متخيل أننا هنتبسط كدا ونلاقي مواهب. ودا يمكن جهل مني.

تعاملت إزاي مع أصحاب الأصوات السيئة. اللي ظهرت في البرنامج؟

بقول له نصيحة متغنيش تاني لكن في النهاية الحكم هو الجمهور وكل المواهب هتتعرض.. ممكن أنا وجهة نظري أن حد صوته وحش لكن اللي بيتفرجوا عليه يشوفوا أن صوته حلو.

إيه هي معايير اختيار مكان عرض البرنامج؟

الاختيار بيبقى معاينة من المخرج وعلى حسب التصاريح يعني مثلا في إسكندرية كان نفسنا نصور في محطة الرمل منفعش فروحنا عند قلعة قايتباي.

قررتوا هتصوروا الموسم التاني من "ذيع موهبتك" فين؟

الموسم الجاي هيكون في الصعيد.

عندك توقعات لردود فعل الناس في الصعيد؟

معنديش توقعات عن الصعيد، وأعتقد أن الثقافة اختلفت عن زمان في تعامل الناس مع الفن وإمكانية إن ولادهم يظهروا في البرنامج ويغنوا.

في المواسم الجاية ناويين تروحوا القرى والنجوع؟

بالتأكيد عندنا نية إننا نروح القرى لأن في مواهب كتير هناك، احنا بس مضطرين الفترة الحالية نبقى في الأماكن الحيوية في المحافظات عشان التصاريح الأمنية ولأن التصوير في القرى والنجوع محتاج تجهيزات أكتر.

استقبلت إزاي إشادة "باسم يوسف" بـ "ذيع موهبتك" ؟

فرحت جدًا، وكلمته قولتله مش عارف أشكرك إزاي.

تفتكر ليه "باسم" تحمس للفكرة؟

"ذيع موهبتك" من الحاجات اللي "باسم" بيحلم بها، هو من زمان نفسه في برامج يوتيوب يطلع منها ناس زيه.

اشتغلت مع "باسم" من الموسم الأول للـ"البرنامج".. البداية حصلت إزاي؟

باسم كان بدأ فيontv وقتها كنت سايب شغلي ولسه بعافر، وجالي عرض لبرنامج سياسي ساخر بعد الثورة اسمه "ع الرصيف"، قولتلهم فيه أستاذ في المنطقة دي اسمه "باسم"، بس بدأنا شغل وفوجئت بفريق "البرنامج" بيكلموني، إن "باسم" عايز يشوفني.

طبعًا روحت على طول؟

"يضحك" لا كنت مش عارف الموضوع هيبقى إزاي قولتلهم ممكن نتقابل على 8 بليل. ولما الوقت جه، كلموني، قولتلهم مش هأفضى قبل 11 ففوجئت بيهم بيوافقوا. قولت يبقى هقابله يعني هقابله.

والمقابلة الأولى مع أشهر مقدم برنامج ساخر في مصر كانت إزاي؟

لقيت باسم حد لطيف "تحس إنه ابن خالتك"، اتكلمنا شوية عن طبيعة البرنامج وشرحلي الحلقة اللي محتاجني فيها، فقولتله مش حابب أطلع. سألني عن السبب قولتله مش عارف مش عايز. سكت لثواني وقالي جارحي الورق أهو ويلا أنت اللي هتعمل الدور.

دي كانت حلقة الدكتور النفساني؟

أيوه، صورناها وبعدها بيومين لما اتذاعت لقيت الناس بتشاورلي في الشارع وتناديني باسمي.

وحسيتوا بإيه لما البرنامج وقف؟

كابوس.. الواحد مكنش مصدق، وكنا بنقول لبعض أكيد احنا هنطلع الأسبوع الجاي، واليوم الأخير لينا، لما ودعنا باسم كان احساس سيء، لحد دلوقتي مش قادر استوعب الموضوع، وبقول أن في حاجة هتحصل ونرجع تاني، لأن مفيش برنامج هيطلع زي "البرنامج" ولا فريق فيه نفس الروح.

واضح إن "باسم" كان له دور كبير في تجربتك.

أي حاجة وصلتلها أو هأوصلها السبب هيكون "باسم"، الراجل دا أصر أني اشتغل معاه، وهو اللي وصلني لـ "ذيع موهبتك"، جمايله عليا كبيرة أوي، والشغل معاه نقلة في حياتي.

إيه رأيك في البرامج الساخرة اللي ظهرت مؤخرا.. والمقارنة مع "البرنامج"؟

لطيفة.. كويس إنه يكون في حاجات متنوعة في مصر، "البرنامج" فتح باب للناس تدخل المجال، أنا مش حابب أقيم حد، بس المقارنة بتقول إن "البرنامج" عايش مع الناس ومكمل.

بتشوف إزاي تجارب زي تياترو مصر؟

محاولة لطيفة وحلوة لرجوع المسرح لكن أنا نفسي محمد صبحي وَحش المسرح يرجع لأنه هو اللي هيرجع المسرح، ، وعامة زي ما صبحي قال مش ده المسرح، لكن ميمنعش إن تياترو مصر محاولة كويسة وطلع منهم نجم زي علي ربيع لكن في أقوى.

150 اسم أول فيلم أخرجته في 2012.. ليه مكررتش تجربة الإخراج؟

الفيلم ده كان تجربة فيلم قصير، عملته عشان ادخل به مهرجانات، كنت بلعب الموضوع هواية، لأني دايما بقول على نفسي أنا ممثل محترف ومخرج هاوي، وفكرة أني مكررتش تاني هو كسل مش أكتر.

قدمت دور بطولة في فيلم "حصلنا الرعب" في 2014.. ليه محققش النجاح المتوقع؟

توقيت نزول الفيلم كان سيء، لأنه نزل في 7 يناير ، والوقت ده كان امتحانات وكمان كان تقريبا في استفتاء 15 يناير، بالإضافة إنه كان في مشاكل إدارية كتير، لكنه كان فرصة لأنه بطولة.

بتحلم بإيه لـ "ذيع موهبتك" الفترة الجاية؟

بحلم إننا نصدر فكرة "ذيع موهبتك" لكل العالم، إن كل دولة يبقى فيها برنامج ينزل كل شبر ويدور على المواهب.

في أي مشاريع جديدة لـيك غير البرنامج؟

لحد دلوقتي لا. مركز في "ذيع موهبتك"بس، وبحلم بالسينما طول الوقت.