"نادي الڤيديو".. نبتدي منين الحكاية الحلوة؟ (حوار)

كتب- محمد مهدي:

قبل ساعات من حلول ذكرى وفاة الفنان "عبدالحليم حافظ"، بث 3 أصدقاء ڤيديو على موقع يوتيوب باسم "نبتدي منين الحكاية؟"، يحمل - في دقائق معدودة - رائحة وسِحر وجمال الماضي، حيث يتناول جزء من سيرة "العندليب" في أعين من أحبوه بصدق وأخلصوا لهذا الشعور الطيب رغم مرور نحو 40 عاما على وفاته.. ونس من حيث لا تدري يأتيك لحظة مشاهدة الڤيديو.

"نبتدي منين الحكاية؟" هو العمل الأول لـ "نادي الڤيديو" لكنه ليس الأخير كما تقول "مريم عبد الجابر" أحد أعضاء الفريق. هو بداية لمشروع ظهر من رحم الحماس. وممتد إلى أن يشاء صانعيه الاكتفاء منه.

هو امتداد لـفِكرة "نادي الڤيديو" المنتشر في فترة الثمانينيات والتسعينات لكن في ثوب جديد يمكن التعرف عليه فضلا عن تفاصيل آخرى من خلال الحوار- العامي- الذي أجراه مصراوي مع "مريم" عبر الإنترنت.

- كلمونا عن فكرة "نادي الڤيديو".. بدأت إزاي؟

"نادي الڤيديو" فكرته جت بعد ما كنا خلصنا "نبتدي منين الحكاية؟" وقررنا إننا عايزينه ما يبقاش الڤيديو الأخير، وإننا هنعمل قناة على يوتيوب وصفحة على فيسبوك، وهنكمل كمشروع وسمناه في ساعتين تقريبًا "نادي الڤيديو".

- ليه"نادي الڤيديو"- سر اختيار الاسم-؟

لأنه هيبقى عامل زي محلات تأجير شرايط الڤيديو بتاعت زمان، تدخل تلاقي أنواع مختلفة عن بعض وكلهم ڤيديوهات.

- إيه أكتر شيء حبيتوا تظهروه في "نبتدي منين الحكاية؟"

العلاقة القوية جدًا بين مغني وجمهوره لدرجة إنهم مش ناسين يوم ما مات لحد النهارده، ولدرجة إن فيه اللي قرروا ينتحروا يوم وفاته.

- خَد وقت قد إيه في تنفيذه؟

يومين كاملين تصوير، وحوالي شهر تحضير وتقفيل.

- وصلتوا للسيدات المبهجات دول إزاي؟

دول أمهاتنا وأمهات صحابنا والحمد لله طلعوا مختلفين عن بعض من حيث الشكل والشخصية.

- واجهتم أي صعوبة في اقناعهم بالتصوير؟

كان فيه صعوبة شوية علشان بيبقوا مكسوفين من التصوير.

- فريق عمل "نادي الڤيديو".. إتكون إزاي ودور كل واحد؟

فريق العمل تلات أشخاص: كريم عبادة (مخرج ومونتير)، وكمال سامي (مدير تصوير بس قام بتلوين الڤيديو)، ومريم عبد الجابر (كاتبة وصاحبة الفكرة).. أما التكوين فكان بشكل تلقائي لأننا صحاب من زمان.

- الإنتاج.. المشكلة العويصة في أي مشروع جديد.. بتتغلبوا على الموضوع دا إزاي؟

حاولنا يبقى الإنتاج مقدور عليه على قد ما نقدر.. وبنشوف إن الانتاج هو الفكرة والناس اللي نفذّوها.

- فيه مشاريع بتبرق وتعلم مع الناس وتختفي فجأة.. ناويين تعملوا إيه عشان تفضلوا مكملين؟

مفيش حاجة بتتعمل علشان ده ما يحصلش غير إننا ما نزهقش نفسنا، ومنحرقش طاقتنا بسرعة فنبتدي نتعب.. يعني نحاول نخلي الموضوع ممتع وبسيط على قد ما نقدر زي اللعبة.

- ممكن نلاقي "نادي الفيديو" على التلفزيون لو سَمع مع الناس.. ولا هدفكم اليوتيوب بس؟

بدري أوي على إننا نفكر في النقطة دي.

- فيه أي مشاريع جديدة -أفلام روائية قصيرة، تسجيلية، وثائقية- بتفكروا تنفذوها؟

أكيد فيه ألف حاجة في مخنا بس لسه هنقعد نتكلم ونشوف ونقرر.