بتلعب بوكس بالنقاب وتتمرن بكاوتش جرار.. ياسمين فتاة الإسكندرية مازحة: "بنستعد للرجالة"- فيديو

كتب- أحمد نصرة:

انتشرت مقاطع فيديو على موقع التواصل الاجتماعي "فيسبوك" لشابة تدعى ياسمين الأجدر، وهي تمارس رياضة البوكس، وتؤدي تمارين بدنية عنيفة.

وجاء انتشار مقاطع الفيديو بالتزامن مع انشغال الرأي العام بحوادث قتل سيدات لأزواجهن، وقالت الفتاة مازحة: "بنستعد للرجالة".

وقالت ياسمين: "لقيت نفسي في مثل هذه الرياضات العنيفة ولا أهتم بالانتقادات لأني مش بعمل حاجة غلط، بل على العكس كل بنت لازم تتعلم فنون الدفاع عن نفسها بعد تزايد حالات التحرش".

وأوضحت ياسمين: "الناس بتنتقدني لكن أنا مضطرة أروح جيم رجالي لأني مرتبطة بوجود كابتن للبوكس، وده مش موجود في الصالات المخصصة للسيدات اللي الكورسات فيها بتبقى أغلبها زومبا وتمرينات خفيفة".

وأكملت: "الناس في الجيم كانوا الأول بيبقى في عينيهم نظرات استغراب، زي أي حاجة جديدة، لكنهم في النهاية اتعودوا وبقى الأمر عادي".

وأكدت: "أهلي دعموني في اللي بعمله، ووالدتي رحمة الله عليها كانت تشجعني دايمًا وشايفة إني بعمل حاجة كويسة".

"مش قلقانة خالص من فكرة إن اللي بعمله يأثر على فرص زواجي، لأني في الأول والآخر مش هختار غير حد رياضي له نفس اهتماماتي ومتفهم لاختياراتي".. هكذا قالت ياسمين.

وتنهي ياسمين حديثها موجهة رسالة إلى منتقديها: "انتقدوني زي ما تحبوا لكن بأدب، ومن غير غلط، أنا مؤمنة إن مفيش حد كامل لكن الكلام لازم يكون باحترام".