ضحية "التسوق الإلكتروني" يروي لـ"مصراوي" تفاصيل نجاته من الموت

الشرقية – فاطمة الديب:

"مش مصدق إني كنت هموت علشان خاطر 3300 جنيه".. بهذه الكلمات بدأ "إسلام حاتم" الطالب بالفرقة الثانية بالمعهد المدني للهندسة وتكنولوجيا الطيران، تفاصيل نجاته من الموت على يد ثلاثة أشخاص، بعدما أوهمه أحدهم ببيع "عدسة 50 مللي" يحتاجها بمدينة العاشر من رمضان، وذلك عبر موقع تسوق إلكتروني شهير.

وأضاف إسلام: "كنت بدور على عدسة للكاميرات بتاعتي وبصراحة كنت لسه بايع العدسة القديمة علشان مش معايا ثمن واحدة جديدة، خصوصًا إني من كفر الشيخ وقاعد في القاهرة علشان دراستي"، موضحًا أنه بحث كثيرًا عن عدسة مستعملة وخاطب العديد من الأماكن الشهيرة حتى وصل به المطاف إلى التسوق عبر الموقع الشهير.

وروى الطالب لـ"مصراوي" تفاصيل الواقعة: "اللي تواصلت معاه اسمه فريد، وكان عارض العدسة بـ 3300 جنيه وبصراحة السعر كان هو فعلًا سعرها الحقيقي وعلشان كدة مكانش عندي شك في الموضوع وروحت له يوم الأحد اللي فات حسب الاتفاق الساعة 7 ونص عن موقف الأردنية اللي في العاشر من رمضان".

وتابع: "أول ما نزلت لقيته مستنيني وفضل يتكلم معايا شوية وقال لي إن بيته في المجاورة السادسة وهنركب ميكروباص لهناك وأنا هستناه في قهوة تحت البيت لغاية ما يطلع يجيب العدسة اللي هيبيعها لي وينزل"، منوهًا إلى أنهما بالفعل استقلا السيارة وفي الطريق طلب اثنان من الركاب النزول، قبل أن يتبعهما فريد: "لقيته بيقول لي خلاص إحنا الداخلة اللي جاية وشاور للسواق علشان ننزل".

وواصل: "نزلنا وقال لي هنتمشى لغاية الناصية اللي جنب المعهد العالي للتكنولوجيا علشان البيت قريب من هناك، لكن مفيش 5 دقائق إلا ولقيت الاثنين اللي نزلوا قبلنا من الميكروباص ورانا وواحد فيهم ضربني على راسي بشومة والتاني نزل فيا ضرب بمطواة، وكمان لقيت فريد معاهم وكلهم اتكاتروا عليا لغاية ما خدوا مني شنطتي اللي كان فيها الكاميرا وفلوس العدسة".

وأشار إسلام إلى أنه ذهب إلى مستشفى "التأمين الصحي" بالعاشر من رمضان، حيث احتاج جراحة لأكثر من 29 غرزة لتقطيبها: "الدكتور قال لي إن كان فيه 8 جروح في راسي غير كسر بالفك العلوي وكسر في عضلات الجبهة، وأعطوني تقرير طبي سلمته لقسم الشرطة علشان المحضر رقم 2899 جُنح أول العاشر لسنة 2018".

اقرأ أيضاً:

بعد مقتل طالب الهندسة.. كيف تؤمن نفسك من مخاطر الشراء عبر الانترنت؟