"مصراوي" يكشف حقيقة عودة "دراكولا الحيوانات" بالشرقية

الشرقية – فاطمة الديب:

"الغنيمية".. قرية هادئة مثل العديد من قرى مركز أبوكبير بالشرقية، إلا أن أهلها كانوا على موعد جديد مع الرعب والفزع، بعد عودة ما يسمونه "دراكولا الحيوانات" لممارسة طقوسه القديمة، التي تتمثل في مواقعة الحيوانات جنسيًا وامتصاص دمائها قبل ذبحها وسلخها، ثم أكل لحومها نيئة.

"مش هنستنى لما يدبحنا زي القطط والكلاب اللي بيقطعها وياكلها".. بهذه الكلمات بدأ وجيه محمد، مدرس جغرافيا بمعهد فتيات ''الرحمانية'' بأبوكبير، حديثه لـ"مصراوي" عن مأساته مع شقيقه المريض نفسيًا "صلاح".

يضيف وجيه: "اللي بيحصل لنا دا ميرضيش ربنا.. أخويا بيهددنا يوميًا بالذبح وحاول يخنق بنته بإيشارب لكني لحقتها، وبعدها حاول يذبح بنت جارنا.. غيثونا منه وعالجوه، وبعد ما حاول يموّت بنته، روحت للعمدة أشتكي له، قالي مقدرش أجيلك غير لما يبقى حد مدبوح أو فيه ميت".

ولفت إلى أن مرض صلاح، بدأ بعد أن باع ميراثه لفتح محل جزارة في سيناء عام 2009، إلا أن خسارته في تجارته جعلته يعود بحالة نفسية سيئة، أصبح دائم الشك فى في أهل بيته، "حتى كوباية الشاي كان بيخلي مراته تشرب منها قبل ما يشربها، وبعدها حصل له اللي حصل، لحد ما في يوم حط السكينة على رقبة أمه وكان عاوز يدبحها، وولاده قعدوا من المدرسة بسبب أبوهم".

ويقول محمود عبدالرحمن، 53 سنة، فلاح، مُقيم بالمنزل المجاور، إن حال "صلاح" لا يمكن السكوت عليه، مشيرًا إلى تطور مرضه، فهو يُهدد الأطفال والنساء بالذبح، مضيفا: "من كام يوم كان بيسن السكاكين على الحيطة ويقول لنا اللي يقرب من هنا هدبحه، ومن فترة شاف بنتي بتضحك قال لها هدبحكوا كلكوا".

يواصل محمود: "كان بيدبح الكلاب ويحط لحمتها في أكياس، ويحط أمعاء الكلب في كيس لوحده ويديه لابنه ويقول له خلي ده معاك حرز علشان الناس تخاف منك".. يتنهد قبل أن يتابع: "إزاي دا مش مجنون وهو كل يوم عمال بيدبح في القطط والكلاب، والله بقالي 15 يوم في البيت من غير أكل، بسبب ريحة الحيوانات اللي بيدبحها ويسلخها في الزريبة جنبنا.. الأطفال بيخافوا يعدوا من قصاد البيت أحسن يقتلهم، والكل هنا في رعب ومحدش حاسس بينا".

وأردف: "بعد ما خرج من المصحة المرة اللي فاتت، أخوه جوّزه واحدة غلبانة من البلد، وهي دلوقتي مغلوبة على أمرها وبتمسك معاه الكلاب وهو بيسلخها، وبتسمع كلامه علشان ميقتلهاش.. صلاح بقى وحش وبعد ما يخلص على الكلاب والقطط هيدخل على عيالنا.. الحقونا يا خلق هوه".

وكلف اللواء خالد سعيد، محافظ الشرقية، الدكتور حسام أبوساطي، وكيل وزارة الصحة، بالتحري والبحث وفحص الحالة المرضية لـ"دراكولا الشرقية".

وقال الدكتور حسام أبوساطي، إن المتهم أصيب بمرض نفسي خلال نوفمبر 2013، دخل على إثره مستشفى "العزازي" لتلقي العلاج، لمدة 4 أشهر، وخرج في شهر مارس 2014 بعد أن تماثل للشفاء واستقرت حالته النفسية.

وأوضح أنه كان لزامًا على إدارة المستشفى أن تُصرح له بالخروج، حيث تم الاتصال بأهله، ولم يتقدم أحد لاستلامه، ما اضطر إدارة المستشفى لتسليمه لأهله عن طريق مندوب؛ طبقًا للقانون.

وأشار أبوساطي، إلى أنه بالاتصال بعمدة القرية، أفاد الأخير بأن "صلاح" على خلاف ومشاكل دائمة مع أسرته؛ نتيجة زيادة متطلباته، الأمر الذي أدى لترويج شقيقه شائعة بعودة المرض إليه مرة أخرى، وهو فى الحقيقة سليم ومعافى تمامًا، على حد قول العمدة.