السكر في دمياط.. السوق السوداء تسيطر والتخفيضات وهمية

دمياط – محمد عبده:

عبر الكثير من أهالي محافظة دمياط عن استيائهم من نقص السلع التموينية المقررة عند البدالين، فضلا عن ارتفاع أسعارها بشكل جنوني خلال الأسابيع القليلة المنقضية رغم كثرة الشكاوى وتنظيم معارض لبيعها بأسعار مخفضة.

وقال يوسف عبد السلام، نجار، إن الأزمة التي بدأت قبل أشهر عديدة ما زالت موجودة وهناك حالة غضب عارمة بين المواطنين لأن البدال التمويني أصبح يشتري الزيت والسكر من تجار الجملة ويبيع هذه السلع بأسعارها العادية.

وأضاف عبد السلام "زجاجة الزيت بـ 24 جنيه وكيس السكر بـ 13 جنيه ولو سألت البدال التمويني دي حاجة الحكومة يقول لك مفيش تموين وروح اشتري من بره"، وبيّن أنه لم يعد هناك أي فارق بين الشراء من البدال التمويني أو صاحب "محل بقالة" لأن الأسعار تعتبر واحدة.

وأكد محمد السعيد، مدرس "مفيش زيت وبنشتري من بره، وبضعف التمن تقريبًا أو البدال التمويني بيصرف لنا الزيت العادي بفرق العيش وبندفع الباقي، واتكلمنا كتير ومفيش حد بيستجيب لكلامنا".

وتابع قوله "عايز أؤكد على إن حتى الأرز أسعاره في التموين متفاوتة، رغم إنه بجودة واحدة، وبالتالي مفيش رقابة على الأسواق وده بيضر بينا".
من جانبه، أشار حسام شكري، بدال تمويني، إلى أن المشكلة تأتي في وجود عجز بشكل كبير في الزيت المخصص من التموين، إلى جانب ارتفاع أسعار السلع بشكل كبير وكذلك تكلفة النقل وكل ذلك يصب في خانة زيادة الأسعار.

وأضاف شكري "محلي لا يوجد فيه كيس سكر واحد حاليًا ولكن توجد كمية قليلة من الزيت ومعظم المواطنين بيطلبوا أنواع أخرى من الزيوت وبالتالي بقدر أوفر ليهم ده وكمان السكر الفاخر، وببيع الكيلو بـ 13 جنيه، والزيت كل شركة بتفرض سعرها على السوق، وطبعا فيه زيادات مهولة".

وعن تعامله مع المواطنين قال:"الناس تقبلت الوضع، كان في الأول ممكن يفكروني بضحك عليهم لكن لما شافوا وعرفوا اللي بيحصل في المحافظات التانية عرفوا إنها أزمة كبيرة".