رمضان يعني ماما!

كبرت واتجوزت يا أمي وعرفت إن رمضان كان جميل بيكي..

قبل ما اتجوز كنت بشوف إن رمضان حلو وكنت بستغرب جداً ليه أهلنا بيشيلوا همهُ.

قبل ما أتجوز كنت بلاقي السفرة متحضرة ومليانة أكل كتير وكنت بقفش أوي لو بس لاقيت السمبوسك باردة شوية من غير ما أشغل نفسي أحس بمين اللي تعب في عز الحر والصيام عشان يحضر كل ده.

كنت بشوف عصاير رمضان مالية التلاجة من غير برضو ما أشوف مين اللي وقف يتهلك وهو بيعملها.

كنت بشوف الأطباق والكوبايات مغسولة من غير ما أشوف مين اللي وقف وهو ميت من التعب يغسلها.

كنت بشوف كل حاجة موجودة من غير ما أشوف هي إزاي بقت موجودة!

كنت بشوف كل ده من غير ما كنت أشوف مين اللي عمله.

مكنتش بحس بتعب أمي عشان تطلع لنا أيام رمضان بالشكل الجميل ده..

ودلوقتي.. أنا إتجوزت وخلفت وعرفت إن رمضان لازم يتشال همه، عرفت إن رمضان كان جميل بماما، بتعبها اللي كانت بتختاره لنفسها عشان تريحنا بيه.. بابتسامتها اللي كانت بتنفي بيها أي تعب وتحسسنا إنها كويسة.

كبرت واتجوزت يا أمي وبقيت زيك مش عارفة اتفرج عالمسلسلات وبقيت بقولهم "علوا الصوت شوية" عشان أسمع المسلسل، وأنا واقفة في المطبخ بغسل المواعين.

بقيت لما حد يسألني "بتعملي اية ده كله في المطبخ!" أرد بعصبية رهيبة وأقولهم جملتك اللي كنت بتريق لما تقوليها "كنت بلعب كورة!"

كبرت واتجوزت وعرفت إن كان معاكي مليون حق لما كنتي تتعصبي لما حد يسألك عن الشوربة أو السلاطة، ما هو أصل صحيح مش بعد كل الطبيخ ده يمسكوا في "غياب" الشوربة!

كبرت يا أمي وبقيت بعمل كل حاجة كنت زمان بتريق عليكي لما بتعمليها، بشيل هم دخلة رمضان، بصوّت في وسط اليوم لإني اكتشفت إني نسيت أطلع الفرخة تفك، بقيت بحضر حاجة الخشاف من بالليل وأتخانق مليون خناقة لو حد قالي "الأكل حادق"، وأقلب الدنيا لف عشان ألاقي ماركة السمبوسك اللي كنت أقولك "يا ستي ما أي سمبوسك!"، وكنتي تصممي مبتجيبيش غيرها عرفت إنها فعلاً أحلى نوع.

عارفة يا أمي؟ حتي الأطباق والحلل اللي كنتي بتصممي تغسليها بعد الفطار وأنا كنت أقولك وقتها "يا ستي ما تسيبيهم يعني هما هيطيروا!" بعد ما اتجوزت يا أمي بقيت لازم بعد الفطار علطول أقوم جري أغسل كل حاجة.

بقيت بفطر وأنا واقفة عشان ألحق أصلي المغرب عشان بعد الفطار ببقى بجري أنضف حاجة الفطار.

بقيت آخر كل يوم في رمضان أحدف نفسي عالسرير وألاقي نفسي بقول جملتك اللي كنت بتقوليها "آه يا ضهري!"

باختصار شديد بعد هلاكي وتعبي عشان أطلع رمضان بشكل جميل بقيت "مبتقدرش" زي ما كنت زمان "مبقدرش".

كبرت واتجوزت يا أمي وعرفت إن رمضان كريم بيكي.

كل سنة وكل أم هي السعادة والحياة لولادها.. كل سنة وإنتوا طعم رمضان..

رمضان كريم بيكوا يا أمهات مصر:)