لمين بتضحك يا بديع؟!

بقلم - حمدي رزق:

آدى بديع عاد للتغريد من تانى

والمقطم هلّت أنواره

وفين رئيسى اللى رمانى

من جنة المرشد لناره؟!

أيام رضا الرئيس يا زمانى

هاتها وخد عمرى

اللى انتخبته رمانى

وفاتنى وانشغل عنى

■ ■ ■

كان الرئيس (المنتخب) غنوة

والتنظيم يغنيها

وخطبته الحلوة كل يوم جمعة

نفضل نعيد ونزيد فيها

ووعده الانتخابى (الـ100 يوم) كان وهمى

ورخص التوك توك من بنات أفكاره

يلاغى حماس على حدوده

ويناجى بيريز فى خطاباته

وصلواته (فجرا) بتسحرنا أنا وهو

أنا والمرشد مافيش غيرنا.. مافيش غيرنا

■ ■ ■

آدى بديع عاد للتغريد من تانى

والمقطم هلّت أنواره

وفين رئيسى اللى رمانى

من جنة المرشد لناره

لمين بتضحك يا بديع؟!

لياليك وأيامك

كان لى فى عهدك رئيس أليف

عاهدنى أدامك

وكان لى فى رقبته دين

يثأر للشهداء

من يوم ما فاتنى الرئيس وراح الاتحادية

شدو التحرير نواح

والعلم لون الجراح

يامرسى يــا يـــا يــا يــا مرسى

■ ■ ■

مر خيرت الشاطر بعده

دبل زهور الثوار

والتحرير من بعده هوان ويأس وآلام

لا الثائر بينسى حقوقه

ولا رئيسه بيرحمه

وكل ما أقول آه

يزيد فى تجاهله ويؤلمنى

■ ■ ■

وآدى المواطن يا طول لياليه

على اللى فاته رئيسه

يناجى نائبه (مكى) ويناديه

ويشكى لمساعديه تعذيبه

يا ياسر، يا باكينام، يا مرقس، يا عبدالغفور، يا حداد

هاتوا لى من الرئيس كلمة تواسى المواطن الحيران

أخد الرئيس دعم البنزين 95 منى وفات لى سعره يؤلمنى

ماعرفش إيه ذنبى غير إنى فى حبى (للرئيس) أخلصت من قلبى

وغاب الرئيس عنى، كل يوم مسافر

لا كلمنى، ولا قال لى إمتى راح أشوفه!

وأقول يمكن هيسمعنى ويبعت فى الشتا طيفه

آدى بديع عاد من الحج تانى

والمقطم هلت أنواره

وفين رئيسى اللى رمانى من جنة المرشد لناره؟!