بنتكلم بما يرضي الله.. السيسي: هل مصر عملت برنامج لـ3.5 مليون فدان في 40 سنة فاتت؟

كتب- أحمد السعداوي:

طالب الرئيس عبد الفتاح السيسي، خلال افتتاحه مجمع الأسمدة الأزوتية بالعين السخنة، اليوم الأربعاء، الحكومة والقوات المسلحة والجامعات بعمل رحلات للطلاب إلى المشروعات التي تُقام على الأراضي المصرية.

وقال الرئيس السيسي: من فضلكم اعملوا رحلات للطلاب.. تعالوا شوفوا اللي بيتعمل في أرض مصر وبإيد إخواتكم، وماتدوش فرصة لحد يعبث بعقول الناس، ويتقال دي حاجات مش حقيقية، وأنا باتابع من كام يوم خدوا طلاب جامعة أسوان، راحوا مشروع توشكى. علينا دور تاني، ناخد شبابنا نفرجهم ويتفاعلوا.

وأضاف السيسي: الـ3.5 مليون فدان دول، ووزير الزراعة يرد عليَّ، هل مصر عملت برنامج لـ3.5 مليون فدان في 40 سنة فاتت؟ احنا بنتكلم بما يرضي الله، ماقصدش حاجة، وفيه فرق أعمل تغطية إعلامية مناسبة وتغطية كمان لشبابنا يشوفوا.

واستطرد السيسي: انتوا عارفين عشان نعمل موضوع الدلتا الجديدة ووسط سيناء، احنا عملنا معالجة مياه صرف صحي كانت بتلقي في المنزلة، عملنا محطات بحر البقر والمحسمة، عشان ناخد المية دي في محطات رفع.

وتابع الرئيس السيسي: إوعوا تفتكروا إن ده تكلفة اقتصادية، طب حد يقول لك المطورين يخشوا يعملوا ده، طب احنا عملنا، عملنا العبء الأكبر، الأرض بقت موجودة، اللي عايز يتعاقد ماعندناش مشكلة، بنتكلم عن زراعة حديثة وري حديث.

وقال الرئيس: من حق الناس تشوف اللي بيتعمل، لأنه أرقام مالية هائلة بفضل الله، ثم جهد الناس.. احنا عايزين نوري الكلام ده للناس كلها في مصر؛ عشان الناس تعرف إن فيه جهد كبير جدًّا عشان نقلل فجوة الغذاء، لكن يظل النمو السكاني تحديًا كبيرًا.

ودعا الرئيس السيسي الإعلام إلى تسليط الضوء على المشروعات التنموية الضخمة الجديدة وبالأخص مشروعات الزراعة الجديدة.

وتابع الرئيس: اتفقنا نعمل أسعار ضمان للقمح والذرة والصويا وعباد الشمس، وأؤكد على كلام وزير الزراعة، احنا بنعمل ضمان عليهم، يعني ده الحد الأدنى اللي هادفعه، ولو السعر العالمي زاد هادفع تاني.. إخوانا اللي في الريف، الأرض اللي معاكم غالية جدًّا، حافظوا عليها أفضل من تبويرها؛ عشان كده باقول التغطية الإعلامية للي بيحصل مهمة قوي.