السيسي عن ارتفاع الأسعار: "حاسّين بالناس كمسئولين وبني آدمين"

كتب- محمد نصار وأحمد السعداوي:

خاطب الرئيس عبد الفتاح السيسي، المصريين قائلًا: إوعوا تكونوا يا مصريين فاكرين إن احنا مش حاسين كمسؤولين وبني آدمين إن الأسعار حمل على الناس؛ لكن والله ما في أكثر من كده نقدر نعمل.

وأضاف السيسي، خلال افتتاحه، اليوم الإثنين، مصنعَي إنتاج الغازات الطبية والصناعية ومحطة توليد الطاقة الثلاثية بمجمع الصناعات الكيماوية بأبو رواش بمحافظة الجيزة: أنا شرحت حاجة واحدة في موضوع واحد، لو الدكتور شاكر حب يسعَّر الكهرباء بالتكلفة الحقيقية، مش باتكلم على اللي إحنا بندعمهم؛ لكن حتى بالنسبة للي وصلنا لتحرير السعر معهم، لا قدرنا نعمل كده مع المصانع ولا المواطنين، بس انت بتعمل كل ده منين، مش من جيبنا؛ لكن من قدرة البلد.

وتابع الرئيس السيسي: أقول ده علشان كلنا نتكاتف، بلاحظ إن بعض الناس بيقولوا دي فرصة نعلِّي الأسعار ومفيش دولار، بالعكس ده الوقت اللي بيظهر فيه حرصنا على الناس وما نغليش الحاجة عليهم.