السيسي: عرضت على اقتصاديين يمسكوا الوزارة قالوا احنا لنا تاريخ وهاتدينا كام؟

كتب- محمد عمارة وأحمد السعداوي:

قال الرئيس عبد الفتاح السيسي، متحدثًا إلى حضور المؤتمر الاقتصادي، التقيت بكتير من الناس الاقتصاديين، تحبوا تييجوا تمسكوا الوزراة، قالوا لأ، احنا لينا تاريخ، أنا مش بالوم حد، قالوا احنا مش هانقدر، حد تاني قال هاتديني كام، أنا باخد مليون واتنين في الشهر، قُلت له ماقدرش، قالي سيبني في مجالي لو فيه نصيحة هاقول لك..

وأضاف السيسي، خلال الجلسة الختامية للمؤتمر الاقتصادي مصر- 2022، اليوم الثلاثاء: انتوا مش عارفين يعني إيه دولة، وبتهدوا بلادكم، الناس الغلابة لما يجي حد يتقدم لهم، يقعدوا ينضفوا البيت عشان يشوفوه كويس، طب الفقير غلبان، طب الغني؟ أنا باكلِّم كل المصريين، البناء الفكري للدستور ماكانش منتبه لقدرة الدولة على تلبية الالتزامات دي، البرلمان يحاسب، والوزير ياخد على وشه، عشان اللي بيطلب حاجة بيطلب حاجة مش موجودة، المسار الفكري للدولة، الموضوع محتاج كل الجهود، عشان البلد دي تطلع لقدام، مش عبد الفتاح يقعد فيها، ده تفكير ضيق أوي.

وتابع السيسي: عايزين نشوف زي بعض، باختلاف، قُل لي وجهة نظرك، أنا حلِّيت مشكلة الموانئ، أنا ماعنديش وقت أتأخر أكتر من كده، ماعنديش مهلة 10 سنين عشان الناس تييجي، اللي أعرف أعمله، أعمل أنا، طب بقت موجودة، اللي عايز يتفضل، لكل الناس بما فيها شركات الجيش، طب شركات الدولة مطروحة، طب مش بتعتبروا ده فرصة، والله أنا صادق معاكم، كل شركات الدولة معاكم، بس ماتجيش تقول لي نفض لي منها العمالة الزايدة واديهالي، طب إزاي يعني؟! لما تعمل شركة قطاع خاص بتنقي ناسك، اللي حصل ده ميراث، إوعى تخلي غضبك من سوء الأداء يتحول لعداء مع اللي بيعمل سوء الأداء، إوعى تكره الفقير.