السيسي: معنديش خصومة مع أحد.. والبلاد مش بتيجي بالدلع والطبطبة

كتب- مصراوي:

قال الرئيس عبد الفتاح السيسي، إن محطة بحر البقر لمعالجة المياه، ستضخ 2 مليار متر مكعب من المياه؛ لزراعة نصف مليون فدان جديد.

وأضاف السيسي، خلال افتتاح محطة معالجة مياه بحر البقر، اليوم الإثنين: "أنا ما باعرفش أطنِّش... كُنت طنِّشت 2011 و2012 و2013، وسِبت البلد دي للمجهول، وباقول لكل مسؤول خُد بالك، ماتسبش غلط قُدامك، أنا ماعنديش خصومة مع أحد، أنا بيني وبين الباطل والشر والتعدي خصومة، أنا عندي كده، يقول لك إنت ليه بتحط نفسك في الكلام ده، وانت خليك جميل وخليك حلو وسيبهم همَّ.. البلاد مش بتيجي بالدلع والطبطبة، البلاد بتيجي بالعمل والالتزام والانضباط.

وأوضح الرئيس السيسي: محطة المياه دي هتعالج 2 مليار متر مكعب، كانوا بيروحوا المنزلة، دلوقتي هيروحوا يرووا نصف مليون فدان زراعي جديد.. مش مقبول حد يبني على أراضٍ زراعية أو يتعدى على جسور، بقول كده للجميع.. هوجة البناء على الأراضي الزراعية انتهت، ده كلام غلط، انتوا بتهدوا بلدكم، والله ده هدم لقدرة الدولة، ماحدش بيتعدَّى على الري والمياه. بأكِّد تاني: 6 شهور وفي كل حتة، زي ما كانت من 30 سنة، تتشال كل حاجة غلط فيكي يا مصر، طول ما أنا موجود في المكان ده.