حوار| بطلة أشهر فيديو في انتخابات الرئاسة: "لو قابلت السيسي هقع تاني"
نادية الرفاعي بطلة فيديو الانتخابات الرئاسية
كتب- محمود رمزي:
تصوير - أحمد النجار:
"تحيا مصر.. تحيا مصر يا سيسي.. يا سيــــسي"، ثم تعرضت لإغمائه أمام الكاميرا، لتفتح قنوات الإخوان والجزيرة النار عليها وتتهمها بتلقي رشوة 100 جنيه مقابل أداء "المشهد التمثيلي".
هل تتذكر هذا الفيديو، الأشهر في الانتخابات الرئاسية الأخيرة؟ مصراوي التقى بطلته في بيتها الفخم بأحد أهم شوارع مدينة نصر، وكشفت لنا كواليس تصوير مقطع الفيديو، وردت على الاتهامات التي وجهت لها.
وحكت السيدة نادية الرفاعي لـ"مصراوي" تفاصيل حياتها اليومية، واختتمت حوارها معنا بتوجيه رسائل للرئيس عبد الفتاح السيسي، والإخوان، وشباب الثورة.
أصبحت بطلة أهم فيديو عن الانتخابات الرئاسية الماضية.. هل كنت تتوقعين ذلك؟
ضاحكة.. لم أكن أتوقع ذلك، أنا مواطنة مصرية، وكنت أمارس حقي الدستوري في الانتخابات الرئاسية، وفوجئت بعدد من الأصدقاء، يتصلون بي للاطمئنان علي، وبيقولوا لي "في فيديو ليكي قدام اللجنة وأنت بيغمي عليكي".
وبعد أن شاهدت الفيديو عن طريق ولاد إخواتي الصغيرين، وشفت كل الشتام والاتهامات لي حزنت أوي، وقلت معقولة هم دول المصريين، لكن أنا سامحت كل من شتمني وسبني لأنه لا يعرف من هي نادية الرفاعي.
زعلت لاتهامي بتلقي 100 جنيه لتمثيل الفيديو "صالون بيتي بـ100 ألف جنيه"
ومن هي نادية الرفاعي؟
أنا ست عندي 63 سنة، كنت بشتغل في شركة للكهرباء، والآن على المعاش، ووالدي كان يعمل في البنك الدولي، وسافرت معه كل دول العالم، شفت اليمن السعيد، عشت في السودان، وأقمت في لبنان فترة، ولي أصدقاء هناك حتى الآن، وأبكي مما أراه في هذه الدول.
وأنا مطلقة منذ 13 عاما، وبلا أولاد، واعتبر كل المصريين أولادي، ولا أتبع حملة، ولا عمري انضميت لحزب، ولم أمارس عملا سياسيا في حياتي، ولست عضوة في حملة الرئيس السيسي كما روجت جماعة الإخوان عني.
أغلب من شاهدوا الفيديو، اتهموك بالتمثيل؟
والله العظيم أبدا، أنا ست كبيرة، ومن الساعة 9 صباحا حتي 9 مساء أمام اللجنة، وبلف على كل المدراس في المنطقة، بغنى وأحث الناس على الذهاب للجان والإدلاء بأصواتهم في الانتخابات، أنا إنسانة أحب السيسي، واعتبره رمزا، وبحبه عن ظهر غيب، ولا أعرفه ولا يعرفني، ومن التعب والإجهاد وانفعالاتي واتصالاتي التليفونية طوال اليوم وقعت من طولي، والناس استغلت الظرف الصحي لي، ولا صورت نفسي ولا قلت لحد يصورني.
نفسي اللي شتموني يشوفني ويعرفوا أنا مين وبنت مين قبل ترديد كلام ظالم
بدون زعل.. البعض قال إنك مأجورة لتمثيل هذا المشهد؟
باكية.. أنا أمثل علشان أظهر حبي لبلدي!!!
معذور من يتهمني، ميعرفش بيتكلم عن مين؟ أنا أعيش في منزل بملايين الجنيهات، وفى أرقى مكان في مدينة نصر، ومن أسرة ثرية جدا، همثل علشان آخد 100 جنيه؟! الصالون اللي أنا قاعدة عليه ده ثمنه 100 ألف جنيه.
أمثل في حبي للسيسي؟! الله ياسمحهم.. وعلى العموم أنا مسامحه كل من أهانني.
أغلب الناس تخيلوا إن الفيديو مشهد تمثيلي بسبب وضوح التصوير؟
والله لا أعرف من صورني، وفوجئت في أحد الأيام بضابط مباحث يأتي إليَ معه شخص، عرفني بنفسه قائلا إنه صاحب القهوة اللي قدام المدرسة اللي فيها اللجنة الانتخابية، وإنه صورني من لحظة وصولي لأنه فوجئ بحماسي، وهو من رفع الفيديو على فيسبوك، وتناقلته كل وسائل الإعلام، وخاصة الإخوان وسبوني وطعنوني في ذمتي وشرفي وأهانوني، وجاءني يعتذر لأنه سبب لي ضررا، وسامحته وقتها .
كيف رأيت استغلال الجزيرة والإخوان للفيديو لضرب مصداقية الانتخابات، ووصف مشهد سقوطك بأنه تمثيلية؟
دول آخرهم يشوهوا الناس، علشان يضربوا السيسي رمز الدولة، وبعد كده يضربوا البلد، ولو عاد الزمن هعمل كده تاني، بشرط إن يكون المرشح رجل عسكري.
السيسي "سترنا وحمانا وأمن شرفنا".. وبقعد بالليل اكتب له جوابات وشعر
أنت ضد المرشح المدني؟
مستنكرة.. المدني؟! يعرف إيه عن مصر وتاريخها، ده لو سؤال عن تاريخ حياته مش هيعرف يرد.
المرشح العسكري مبدأ جوايا، أنا يتكلموا عن شرفي وعرضي ولا يتكلموا عن مصر.
قنوات الإخوان زعموا أنك مسئولة عن حشد الأقباط، وأنك قلت في الفيديو "انزلي يا جانيت"؟
غير صحيح، دول جهلة أولا أنا قلت انزل يا فرج وده زميلي في الشركة، وانزلي يا "إيليجكت" وده اختصار اسم الشركة اللي كنت شغالة فيها.
ومحمد ناصر بتاع الإخوان حرف الكلمة وقال "إنزلي ياجانيت"، علشان يقول إني بحشد الأقباط .
لماذا لم تردي على مهاجميك وتوضحي الصورة الحقيقية عبر حسابك على فيسبوك؟
معنديش حساب على فيسبوك، ولا تويتر، وليس لي أي علاقة بوسائل التواصل. لكن كنت كل ما أقابل الشباب أو البنات اللي أصدقاء أقاربي وأصدقائي أقول لهم حقيقة الفيديو، وده اللي أنا أقدر أعمله. وبفضل أقول لهم " شفتوا الشاب اليمني اللي حضر مؤتمر شباب العالم واتكلم عن اليمن السعيد، ولا البنت الأيزيدية اللي اغتصبها تنظيم داعش" يقولوا لي "لأ مشفناش"، أرد عليهم: "علشان أنتم ناس فشلة وعايزين تعيشوا في خراب زي الدول دي".
بالتأكيد الضجة حول الفيديو تسببت في أزمة لك ولأسرتك.. كيف تعاملتم مع الموضوع؟
عادي.. لا خفت و لاحاجة، أنا شخصية قوية، ومحدش يقدر يقول لي لأ، وبيتعملي ألف حساب وسط أهلي ومعارفي، ولكن أهلي نصحوني بالهدوء، وعدم الاحتكاك بالناس لفترة.
وأنا نفسي اللي شتموني يشوفني ويعرفوا أنا مين وبنت مين وعايشة فين قبل ما يرددوا كلام فيه ظلم لبنت ناس، ومع ذلك أنا طيلة أيام الانتخابات الثلاثة أنزل وأحمس الناس، ونزلت بتيشرت عليه صورة السيسي ولا همني .
اللى صورني صاحب قهوة أمام اللجنة.. واعتذر لي بعد شتائم الإخوان
هل أنت ممن يعتبرون 25 يناير ثورة أم تصنفينها مؤامرة؟
ثورة شباب لكنهم "فشلة"، كانوا هيضيعوا البلد، عايزين نعيش في فوضى، ويضيع البلد تاني، اللى اتلحقت بخير أجناد الأرض. وأنا نفسي من خلال حديثي أوجه للرئيس السيسي رسالة.
ما هي؟
في ناس كتيرة زي نادية الرفاعي، لكن مشاعرهم جواهم أو بيخافوا يقولوا، نفسي أشوفه، بس أنا خايفة من مقابلته، لأني ممكن أقع من طولي تاني، أنا والله بحبه أوي، وبقعد بالليل لوحدي اكتب له جوابات وشعر وبدعي له بالنصر، وربنا يحميه.
25 يناير ثورة لكن شبابها "فشلة" وعايزين البلد تقع تاني
هل أرسلت جوابا منها لمؤسسة الرئاسة؟
لأ .
لماذا؟
خايفة يرموها فى الزبالة، بفضل اكتبها مع نفسي، وعايزة أقولك على مفاجأة، كل سنة أروح عمرة، وفي الـ4 سنين اللى فاتوا كنت بروح وأشرب ميه زمزم بنية الدعوة للرئيس، وادعي للسيسي.
تتوقف قليلا، وتغالب دموعها قبل أن تختتم الحديث معنا باكية: "أبويا سترني في بيت حلو، لكن السيسي سترنا وحمانا وطبطب علينا، وأمن عرضي وشرفي ".
فيديو قد يعجبك:
