السيسي: المدن الجديدة تقضي على العشوائيات وتعطي فرصة لحياة أفضل

كتبت- عايدة رضوان:

قال الرئيس عبدالفتاح السيسي، إن التخطيط للمدن الجديدة ومدن الجيل الرابع؛ يأتي إيقافًا للنمو العشوائي غير المخطط في مصر.

وتابع، خلال افتتاحه المرحلة الأولى لمدينة العلمين الجديدة: "إحنا لو استمرينا على الوضع اللي إحنا بننمو بيه بالطريقة دي، إحنا دولة حجمها 100 مليون إذا استمر البناء على الدلتا بالطريقة دي، والبناء في المناطق المكتظة زي إسكندرية وبورسعيد، بالشكل المخالف اللي إحنا ماشيين فيه ده، هنتحول لكتلة عشوائيات يصعب التعامل معها لـ50 أو 100 سنة جايين، فكان لابد من إنشاء مدن جديدة تمتص الطلب على الإسكان ثم تعطي فرصة لحياة أفضل".

وأردف الرئيس السيسي: "يمكن الناس تقولي يا فندم اللي إحنا شايفينه ده حاجة متميزة قوي، آه طبعًا تتعمل متميزة، مصر دولة فيها 100 مليون وطول عمرها دولة كبيرة قوي، إوعوا تستقلوا نفسكم، بقى أنا ماقدرش أعمل على البحر المتوسط مدن تكون مقاصد سياحية تشغل الناس وتيجي من دول أوروبا في وقت الشتا، الجو بيكون عندهم تلج، ماقدرش أعمل مقصد سياحي ينافس أي مدينة عالمية، لا ده إنتوا مش واخدين بالكم من مصر".

وقال الرئيس السيسي: "ممكن حد يقولي لما إنتوا تقدروا تعملوا قوي كده، أمال إنتوا سايبين السكة الحديد بتاعتكم خربانة ليه، أنا هنا الحاجة هاخد تمنها من اللي هييجي يقعد أنا مش هادفع حاجة من جيبي، اللي جاي يقعد هيدفع لكن أنا عشان أعمل مرفق السكة الحديد أنا بتكلم بمنتهى الأمانة معاكم عشان أشكل وعي حقيقي أنا عايز 200 أو 250 مليار جنيه".