"أهلنا بيزعلوا من التهديد".. أحمد موسى مطالبًا وزير التموين بترغيب المزارع في توريد القمح

كتب- محمد جمعة:

وجه الإعلامي أحمد موسى، رسالة إلى الدكتور علي المصيلحي وزير التموين، بشأن توجيهاته بالضوابط المقررة لحصر ‏الأراضي التي حُصدت والتي لم تُحصد حتى ‏الآن من محصول القمح، وتضمنت تحرير محضر ‏إثبات حالة للمزاعين الذين لم يثبت تنفيذهم القرار الوزاري بشأن عملية التوريد.

وقال موسى، خلال تقديمه برنامج "على مسؤوليتي"، مساء السبت: "هو المفروض في التوقيت ده نعمل ترهيب ولا ترغيب للمزارع؟.. ممكن أقول له السنة دي عندنا أزمة ولازم تقف مع الدولة، إحنا محتاجين القمح السنة دي عشان عندنا ظروف صعبة، زي اللي العالم كله بيعاني منها".

وأضاف موسى: "دي مرحلة ماينفعش أبدًا اتكلم مع الناس بالترهيب، وأقول للمواطن إني هعملك محضر جنحة عشان أردب قمح، والشرطة تنزل تاخد الناس.. المرزاعين هيودوا القمح بس ياريت نزود شوية في السعر من 856 نخليها 900 ولا 950 ولا ألف عشان الناس، ما هي كده كده الفاتورة زيادة، والناس بتقول إنكم بتجيبوا القمح من بره بالغالي".

وتابع موسى: "المزارع بتاعنا طيب ومش بيدق، ولو دعمت القمح بـ 100 جنيه الناس هتدعي ليكم، ياريت تعملوا الحكاية دي وشوفوا رد فعل الناس والـ 6 أو الـ7 مليون طن قمح المطلوبين هيجيوا، لأن الجنحة والمحاضر مش هتجيب حاجة.. الرئيس السيسي بيعمل كل يوم قرارات عفو رئاسي، ومش عايز حد يبقى محبوس".

واستطرد موسى: "الوزير الدكتور علي مصيلحي هناك جهد كبير يبذل، وأهالينا في القرى بيزعلوا لما أقولهم هعملك محضر، رجاء الشعب المصري محترم ومحتاج طبطبة".