سيد علي يوجه رسالة لصاحب كشري التحرير بعد طرد عامل النظافة: "الناس الغلابة هما اللي عملوك"

كتب- محمد أبوالمجد:

علق الإعلامي سيد علي، على واقعة طرد أحد عمال النظافة من كشري التحرير، قائلًا: "عيب"، موجهًا رسالة لصاحب المطعم: "اللي عملك هما الناس الغلابة وصاحب المطعم بقوله الكشري دا وجبة الناس البسيطة ووجبة الفقراء والغلابة اللي زي حالاتنا".

وقال "علي" في خلال تقديمه لبرنامجه "حضرة المواطن" على فضائية "الحدث اليوم" مساء الأحد، في رسالته لصاحب مطعم الكشري: "اللي عملك وعمل ملايينك وعمل كل حاجة عندك هو محمد عادل وأمثاله وعندما تتكبر عليهم فأنت تتكبر على النعمة".

وتابع: "مش هدعو في البرنامج أن الناس يقاطعوك ومش هدعو الناس محدش يأكل عندك لأن الرزق بتاع ربنا، وبقوله اتق الله"، موضحًا: "زي ما ربنا أداك قادر ياخد منك، وأقرأ سورة أهل الكهف وتذكر ماذا حدث لصاحب البستان عيب عليك الكشري وجبة الناس الفقراء".

وأردف: "المؤتمر الاقتصادي المعمول والناس كلها حاضره فيه، منعقد عشان محمد عادل والناس الفقراء والبسيطة أوي أوي، وأنا برنامجي اسمه حضرة المواطن، وأنا مهمتي من وقت ما اتخرجت من كلية الإعلام إني شغال عند الفقراء وحضرة المواطن، ودي أهم قضية النهارده لأن كلنا شغالين عشان الناس دي".

وأكمل: "يا صاحب مطعم التحرير اللي صنعك وصنع فلوسك محمد عادل والفقراء، أنت والعاملين معك لأنك لو راجل مضبوط مكنش اللي شغالين معاك يبقوا كده، ينقصك الفهم والإدارة وأشياء كثيرة وفي يدك تصلح ما حدث، بإحضار محمد عادل ومنحه تعويض كبير أوي"، مضيفًا: "لو ملابسه مش عجباك تروح تجيب محمد عادل تديله 100 ألف جنيه أو تعمله كشك أو تجيب له لبس نضيف عشان ربنا يرضى عنك".