شريف عامر يرد على منتقدي حلقة تريند "شيماء"

كتب- محمد ابوالمجد:

علق الإعلامي شريف عامر على حالة الجدل التي سادت خلال الأيام الماضية بسبب حلقة البرنامج واستضافته لأحد مؤدي المهرجانات، قائلًا: "المقدمة مش بيقول المذيع العناوين الرئيسية والعناوين الإخبارية، ولكن في خلال الكام يوم اللي فاتوا حصلت عاصفة كبيرة من ردود الفعل بخصوص يحدث في مصر وبخصوصي، وطبعًا بخصوص شيماء وصاحب شيماء".

وأضاف "عامر" في خلال تقديمه لبرنامجه "يحدث في مصر" على فضائية "إم بي سي مصر" اليوم الثلاثاء: " بنلخص ردود الفعل في 3 فئات، الأولى مشاهد عاتب علينا بشكل حقيقي وصادق معتبرين البرنامج أهم وأفضل من صاحب شيماء، ليكم عندنا حق الاحترام والتوضيح، وفئة أخرى يعتبرونا موجهين وأصحاب أجندات وجزء من المؤامرة الكونية العظمى هنحاول نرد عليهم ونقنعهم".

وتابع: "أنه من الملاحظ أن الأغلبية مشافتش ومتابعتش كانت االانفعال والعواطف قبل السؤال والتدقيق، والفئة الثالثة أصحاب مع الأسف هما أصحاب الأجندات والهوى والمصالح الضيقة جدًا وهي الفئة الأقل، وبالنيابة عني وعن زملائي وباعتبار إني موقفتش في الموقف دا قبل كده احنا بنخلص السنة الحالية السنة الـ8 لينا على الشاشة دي، ومتصورش في أي لحظة قبل كده كنت مضطر أبرر عن نفسي.

وأردف: "في رسالة بقولها للفئة الثالثة الأقلية هقولها وأخليها تتحط في حجمها لا تتصوروا أن الصمت أو الهدوء أو العقل الهادئ ضعف، الفترة اللي فاتت كان في نوع من الطعن شارك فيه بعض زملاء المهنة فيه، بشتغل الشغلانة دي من 29 سنة، كل الاهتمام إني اشتغل واروح وانا مرتاح واعملها بأفضل طريقة".

وأكد: "هدفي أن ولادي في مدارسهم وجامعتهم وبعد عمر طويل ليا ميسمعوش حاجة ضد أابوهم وعلى مستوى القناة 8 سنين، قضيت في القناة أطول مرحلة في سنوات شغلي قناة محترمة ومؤسسة مهنية الأكبر والأهم قدرت تخدم جمهور"، موضحًا: "كتر خير كل شخص ساند مذيع زيي، طبعًا في الأفضل مني وادعي إني بحاول أبقى مجتهد وببقى ملتزم بالصدق والمؤسسة عارفة كده كويس مطلبتش مني الا الاجتهاد والصدق".

وأشار: "في طريقة ممكن المذيع يستخدمها عشان يبقى تريند ممكن اختار اسمين واهاجمهم واسمين اشكرهم ولكني عمري ما عملت ولا هعمل كده، في لحظات هجوم من فترة بسيطة كان عندي حجج وأدلة صوت وصورة تخلي أي صاحب ادعاءات يواجه عقوبات قانونية لكني فضلت العفو عند المقدرة ولو في خطوات قانونية يبقى كل حاجة تطلع أمام جهات تحقيق وجهات قضاء بثق فيها بشكل كامل".

وأوضح: "احنا منعرفش الـ100 مليون بيعملوا ايه كل يوم، لحد دلوقتي أحنا متصورين أن التليفزيون الأكثر تأثيرًا أنا اكتر واحد هبقى زعلان وانا بقول دا بدأ يتغير، ومصر بلد كبيرة وعندها مشاكل بتواجهها لازم نتكلم عنها بطريقة عاقلة ومحترمة دا جوهر شغلنا، وطول ما بنتحرى الصدق دون مخالفة القانون يبقى من حقنا نعرض كل حاجة".

وأردف: "لو بتحكم بهوايا وذوقي في مين يجي ومين ميجيش البرنامج هبقى ممل جدًا، البرنامج اسمه يحدث في مصر طريق الكباش ويحدث في مصر شيماء وصاحب شيماء"، مؤكدًا: "بطلب من حضراتكم تقدروا حاجة إني أنا أعزم في بيتي اللي يعجبني اختار اللي أقعد معاه بعد ما أخرج من الاستديو لكن البرنامج اسمه يحدث في مصر بنتعامل مع كل الموضوعات، وكتر خير كل صاحب ظن كريم وايجابي في حق البرنامج او شخصي، واللي عليا أناقش بموضوعية وبدون إدانة لازم تعرفوا وبعدين تحكموا".