"مسألتش على تفاصيل"..سميح ساويرس معلقًا على سبب تبرعه لمستشفى مجدي يعقوب بالقاهرة- فيديو

كتب- محمد خميس:

قال المهندس سميح ساويرس، رجل الأعمال، وأحد سفراء الأمل في الوطن العربي:"لما قالولي على ندوة صناع الأمل وأنها مقامة هذا العام لصالح الأعمال التي يقوم بها الدكتور مجدي يعقوب، قولتلهم أي حاجة بيعملها أنا جاهز، فطلبوا مني الحضور لدبي، وكنت في طريقي لعمان قلت هاجي في السكة وكل شيء كان مترتب بشكل جيد".

وأضاف "ساويرس" في حواره لبرنامج "معكم منى الشاذلي" على فضائية "سي بي سي" اليوم الخميس: "القائمين على مبادرة صناع الأمل لما كلموني مسألتش على تفاصيل لأني عملت حاجات قبل كده مع الدكتور مجدي يعقوب وشوفت النتائج بتاعت شغله وعشان كدة كنت مطمن، لأنه مش كل يوم الواحد يلاقي فرصة أنها يساهم في موضوع كل اللي فيه جيدين بشكل 100 % ".

وتابع:"جيت عشان أشوف القائمين على مشروع تنفيذ المركز العالمي لعلاج أمراض القلب بالقاهرة عايزين كام، واتفقت مع مديرة المؤسسة المسؤولة عن التبرعات في النهاية، ومقولتش للدكتور مجدي يعقوب على أي حاجة"، موضحًا:"معجبنيش أن يكون مشروع معمول في مصر ومفيش حد متبرع موجود من مصر، من الدكتور مجدي يعقوب المصري، فكان لازم أنا أجي، عشان كده محصلش تنسيق أو دراسات".