هذه وصيتها لي قبل وفاتها.. ابنة شويكار تحيي ذكرى رحيلها

كتبت- شهد القاضي:

أحيت منة الجواهرجي ابنة الفنانة شويكار ذكرى رحيل والدتها الثالثة.

وقالت خلال مداخلة هاتفية ببرنامج 8 الصبح المعروض عبر شاشة DMC عن أحب أعمال والدتها الراحلة إلى قلبها: " أنا بحب كل أعمالها معنديش حاجة مميزة، لأن حقيقي أعمالها كلها كانت حلوة ومحترمة، وكل حاجة كانت مختلفة عن التانية بس أكتر حاجة بحبها هي مسرحية "أنا فين وإنتي فين"، وفي الأفلام بحب "شنبو في المصيدة".

وأضافت: "وروحت معاها تصوير فيلم (شنبو في المصيدة) ومعظمه اتصور في فيلا يوسف وهبي، وكانت بتخاف عليا قوي متروحيش هنا.. متقعديش هنا.. زيها زي أي أم، وكانت متواضعة وحنينة والناس كلها بتحبها".

واستكملت: "ماما كانت بتحب قوي بناتي، أنا عندي بنتين كانت بتعشقهم، وبتخاف عليهم قوي، وبتلعب معاهم وتوديهم المدرسة".

وأردفت عما تعلمته من والدتها الراحلة، قائلة: "اتعلمت منها الإلتزام، وازاي أحترم مواعيدي، وكانت دايما تاخدني الأوبرا".

وأضافت عن عدم حب الراحلة إلى التليفون المحمول، وقالت: "كانت رافضة يكون معاها موبايل ومكانتش عارفة تتعامل معاه، وكانت كارهة للتكنولوجيا والتطور، كانت كل ما تمسك موبايل يا يضيع يا تنساه وأخر مرة قالت لي من فضلك متجبيش ليا موبايل، كانت بتحب تتكلم على تليفون البيت".

وعن وصيتها لها قبل وفاتها، قالت: "أخلي بالي من صحتي، أخلي بالي من زوجي وأولادي وأحافظ عليهم".

ورحلت عن عالمنا الفنانة شويكار، في مثل هذا اليوم 14 أغسطس عام 2020، وهي من أهم وأشهر النجمات في تاريخ السينما المصرية.