"قالولي هتعرف تجيب علا غانم؟"..مصطفى قمر يكشف كواليس التحضير لـ"أولاد حريم كريم"

كتبت- شهد القاضي:

كشف الفنان مصطفى قمر عن تفاصيل تحضيرات فيلمه الجديد الذي يحمل اسم "أولاد حريم كريم"، والمقرر عرضه بدور العرض السينمائي 30 أغسطس الجاري.

وقال من خلال حوار مع الإعلامية سهير جودة عبر صفحتها بموقع التواصل الاجتماعي "فيسبوك": " فكرة الجزء التاني ظهرت بإن كان فيه اقتراح كده ما يالا نعمل جزء تاني، وأغلب الناس مكانوش مقتنعين إن ده هيحصل، ده من سنتين الكلام ده، لغاية ما الأستاذة زينب عزيز والأستاذ علي إدريس قعدت معاهم قاعدة حلوة كده وقالوا يالا نكتب، قولت يالا، طب وعلا قاعدة في أمريكا هتعرف تجيبها؟ قولت لهم آه هجيبها".

وأضاف: "قعدنا وكتبنا معالجة إن الموضوع هيبقى حلو، وزينب عاملة تشابك علاقات صعب جدا، يعني لما يبقى فيه 14 ممثل يطلعوا خلال ساعة ونص، وكل واحد مش عايزة تظلميه، وعايزة الموضوع يبقى حلو، فالفكرة بصراحة كانت صعبة في الأول والسيناريو طلع عبقري".

واستكمل: "فيه أربع أغاني في الفيلم من ألحاني، وفي غنوة عاملين عليها دعاية الفيلم مش موجودة فيه".

وفيلم "أولاد حريم كريم" بطولة مصطفى قمر، بشرى، داليا البحيري، علا غانم، بسمة، خالد سرحان، عمرو عبدالجليل، تيام مصطفى قمر، رنا رئيس، وهنا داود وعدد من الوجوه الجديدة، وتأليف زينب عزيز وإخراج علي إدريس، ومن إنتاج شركة انتلجنت (iproductions) وتوزيع خارجي روتانا.