فردوس عبد الحميد عن نجلها خالد الحلفاوي: مخرج قوي الشخصية

كتب- مصراوي:

تحدثت النجمة فردوس عبدالحميد عن نجلها المخرج خالد الحلفاوي وعن دخوله مجال الفن.

وقالت خلال مداخلة هاتفية ببرنامج الستات على قناة النهار: "مكانش في دماغنا ولا في دماغه خالص إن هو يبقى فنان ودخل كلية تجارة إنجليزي وإتعين وسافر لندن فجأة وهو مستقر وكل حاجة تمام جالي وأنا بعمل زيزينيا قالي عايز أبقى مخرج.. نزلت الكلمة دي عليا زي الصاعقة لأنه كده هيدمر حياته وهيغير المهنة بتاعته يا ترى هينجح ولا مش هينجح".

واستكملت حديثها وقالت: "روحت يوميها مكتئبة جدا وأكاد أعيط عشان كده خلاص راح الولد .. وهو لما بيصمم على حاجة بيعملها وسألني أستاذ جمال عبدالحميد مالك ؟ قولتله إبني بيقول كذا .. قالي هاتيه بكرة وجه تاني يوم ودخل في الشغل كأنه هو مساعد مخرج فاتغير شكل حياته".

وتحدثت أيضا عن علاقتها به في التصوير وأنها ليست علاقة أم وابنها وقالت: "علاقتي بيه في التصوير ممثلة ومخرج وهو مخرج قوي الشخصية بهدوء جدا صوته ميعلاش لكن الكل يحترمه لأن هو متمكن".

وأضافت عن شخصيته: "هو صامت خالص ومبيحكليش أي حاجة وده الخلاف اللي بيني وبينه بعرف أخباره من برا وده بيزعلني .. أنا معرفش عنه ولا حاجة".

خالد الحلفاوي قدم في رمضان 2023 مسلسل كامل العدد بطولة دينا الشربيني وشريف سلامة وإسعاد يونس.