أكرم حسني يحكي تفاصيل موقف محرج جمعه بـ"الزعيم" عادل إمام (فيديو)

كتب- مصراوي:

كشف الفنان أكرم حسني عن موقف جمعه بالفنان الكبير عادل إمام، في أول لقاء بينهما، وأنه عند عمله في الإذاعة، تصادف أن يكون أول عمل له تغطية لفيلم النجم عادل إمام وأن يقوم بالتسجيل معه.

وقال خلال لقائه ببرنامج Sold Out Interviews مع الإعلامي محمود سعد: "أول شغل ليا في الإذاعة كان مع أستاذ عادل روحت سجلت معاه في افتتاح عمارة يعقوبيان".

وتحدث عن استقباله لمكالمة من الزعيم بعدها بفترة: "تمر 6 سنين وبعمل برنامج أبو حفيظة لقيت تليفون جالي رديت، لقيته الأستاذ عادل إمام، أنا كنت عيان وقتها خفيت .. قالي كلام حلو جدا وقالي أنا عايزك يوم كذا تجيلي المسرح تتفرج على المسرحية وشوف العدد اللي عايز يجي معاك، قلتله طبعا يا أستاذ يشرفني.. وبعد ما قفلت افتكرت ان أنا في اليوم ده كنت هطلع مع تامر أمين في البيت بيتك عالهوا واتكسفت أكلم أستاذ عادل وأقوله عندي حاجة".

وأضاف: "وتأخرت جدا والطريق كان زحمة ووصلت بعد الفصل الأول من المسرحية ما خلص .. خلصنا المسرحية ودوني أوضته وحسيت إني عامل زي اللي هيتحاسب، خايف وعايز أقوله إن اللي حصل ده بره إرادتي .. أول ما شافني قالي عيب لما عادل إمام يعزمك على مسرحه وتتأخر واللي عايز يبقى فنان كبير لازم يلتزم بمواعيده".

واختتم كلامه: "وده كان بالنسبالي أكتر موقف محرج اتعرضتله في حياتي، لسه جاي أشرحله الأسباب قالي مش عايز أسمع.. بس خرجت يومها من عنده واتعلمت إني لازم أركز في المواعيد وخدت منه فكرة أن الفنان التزام .. بقت بالنسبالي قانون.. من المواقف اللي سابت أثر عندي".

يذكر أن أخر أعمال أكرم حسني هو مشاركته في رمضان 2022 بمسلسل "مكتوب عليا"، وشاركه البطولة: أيتن عامر، هنادي مهنا، عمرو عبدالجليل، حنان سليمان.