مديحة حمدي: "زوجة الابن كانت لا تجرؤ تنضف أو تطبخ قبل ما تخلص شغل عند حماتها"

كتب- مصراوي:
تحدثت الفنانة مديحة حمدي عن حياتها الزوجية، والفرق في طبائع "الحموات"، وعاداتهم بين الوقت الحالي والماضي، وعن علاقاتها مع زوجات أبنائها بحب دون تفرقة.

وقالت مديحة حمدي، خلال لقائها مع المذيعة مايا الشربيني، عبر قناة صدى البلد: "فيه تقاليد في عيلتنا في الجواز إن أم العروسة ترص حاجات بنتها في شقتها، وأم البنت بتملا التلاجة".

وتابعت: "لو عندي عزومة في البيت أنا مرتبكش عشان مرات ابني موجودة، وتكون عارفة كل حاجة في البيت وعارفة هتعمل إيه.. زوجات أولادي مفيش حاجة بيعملوها ممكن تخليني مش حلوة معاهم.. متربيين كويس أوي".

وعن "الحموات زمان"، قالت: "في البيئات البسيطة كانت زوجة الابن لا تجرؤ إنها تعمل بيتها أو تطبخ قبل ما تخلص شغل البيت عن حماتها سواء كنس أو مسح أو أي حاجة تتخيليها، وأصبح حق مكتسب.. فيه اللي بيتعايش مع الموضوع ده ويتقبله، وفيه واحدة تانية طبيعتها مش كده".

وكشفت أن حماتها كانت غير موافقة على زواج ابنها منها في بداية الأمر، لكن نظرتها تغيرت بعد تعرض ابنها لحادث، وأضافت: "حماتي كانت رافضة زواجنا في الأول ولكن بعد ما شافتني واقفة مع ابنها بعد الحادث تغيرت فكرتها عني وقالتلي لو هدور على واحدة تنفع لابني مش هلاقي أحسن منك، وكنت موضع سرها بعد ما عاشرتني في الحياة، وكنت بقولها يا ماما".