كريم العدل يحكي موقف للهضبة: "كان متعصب من المخرج الأجنبي"

كتبت- مارسيل نظمي:

استعاد المخرج كريم العدل، ذكريات موقف طريف جمعه مع الهضبة عمرو دياب، خلال تصوير إعلان إحدى منتجات المشروبات الغازية

وكتب العدل عبر صفحته الخاصة على موقع "فيسبوك": "مرة عمرو دياب في ٢٠٠٨، كان بيعمل إعلان بيبسي.. وكان متعصب جداً من المخرج الخواجة اللي جايبينه، وكان شايف أنه جاي يعمل سبوبة ومش فاهم حاجة.. ف الكرو كان عمال يهديه، لحد ما واحد بيحاول يهديه قام قايل له: ده والله مخرج طيب جداً".

وتابع كريم العدل حكايته عن عمرو دياب، قائلاً: "قام رادد عليه بصوت عالي وبكل عصبية وقايل له: ما الحمار طيب.. أجيب حمار يخرج لي؟".

واستكمل المخرج الشاب منشوره بحكمة خرج منها من الموقف: "من ساعتها وأنا خدتها قاعدة في حياتي.. فكرة أن الشخص طيب، مش معناه أنه شاطر أو أني اشتغل معاه.. علشان الحمار أطيب خلق الله.. عادي".

ولاقى المنشور رواجاً سريعاً، وتفاعل معه عدد كبير من المتابعين، وكتب البعض تعليقات طريفة ومنهم الفنان محمد جمعة الذي كتب: "الحمد لله أنا اشتغلت معاك وأنا مش طيب خالص"، وقالت المخرجة المصرية مريم أبو عوف: "آه بس الحمار مظلوم. المخلوق بيعمل كل اللي بيطلب منه.. وعمره ما قصر مع حد.. أنا بحب الحمار"، ليرد عليها "العدل": "ما أنا بحب الحمار بس مش عايز اشتغل معاه"

وعلق أحد المتابعين: "أنت كده هتخليني أعيد حساباتي"، وقال آخر: " أنا ليه معرفش القصة دي لكن دايماً بقول نفس الكلمة؟ ما الحمار طيب يعني أعمل له إيه؟ دي كلمتي وأنا وقتها ماكنتش أعرف عمرو دياب"

على جانب آخر يعرض في الوقت الحالي، مسلسل "أزمة منتصف العمر" من إخراج كريم العدل، وبطولة ريهام عبد الغفور، وكريم فهمي، وعمر السعيد، ورنا رئيس، ورشدي الشامي، وركين سعد، وسلوى محمد علي، وآخرين.