نهى العمروسي: "أنا مش ههزأ نفسي ومفيش راجل ولا مهنة تقهرني"

كتب- هاني صابر:

كشفت الفنانة نهى العمروسي، عن سبب ابتعادها عن الفن والتمثيل خلال السنوات الأخيرة.

وقالت، في لقائها ببرنامج "كلام الناس": "أنا مش مخاصمة الفن، هو اللي مخاصمني، بتتعرض عليا حاجات قليلة ووحشة مش قيمتي، وأنا مش ههزأ نفسي، وهقعد في بيتي وأحترم نفسي وأحترم الجمهور، أختفي أحسن ما أظهر في حاجات ملهاش لازمة، أو أدوار مش قيمتي".

وتابعت: "المهم عندي إني مقدرة نفسي.. يا جبل ما يهزك ريح، واللي مش عايز يقدرني، ميقدرنيش، مش مستنية كل الناس تحبني وتقدرني، بس مهنتي لو مقدرتنيش فأنا روح حرة، ومفيش حاجة تقهرني لا راجل، ولا مصيبة، ولا كارثة.. فمش هتقهر، ومش هقعد أستنى يجيني أدوار حلوة أو مناسبة لأني كنت بعمل كدة زمان وأقعد أعيط وأتقهر".

وأضافت: "لما كبرت ونضجت وبقيت بفهم شوية، لقيت نفسي قيمة، وأنا مش نجمة ولكن عارفة قيمتي، ولو الفن مقدرنيش خلاص".

يذكر أن نهي العمروسي ولدت في 11 يناير عام 1963، ليست فقط ممثلة ولكنها أيضًا كاتبة سيناريو، وحصلت الفنانة نهى العمروسي على بكالوريوس من قسم السيناريو بالمعهد العالي للسينما عام 1990.

وشاركت في عدة مسلسلات تليفزيونية منها "إحنا الطلبة"، الحارة"، "مملكة الجبل"، "شارع عبدالعزيز"، "البلطجي"، "ضمير أبلة حكمت"، غيرها، وتزوجت من الفنان مصطفى كريم وأصيب بالسرطان، ثم توفي في عمر صغيرة، ولم تتزوج بعده، وأنجبت منه ابنتها نازلي.

وقدمت نهى للسينما أعمالًا كثيرة أبرزها "جزيرة الشيطان"، "العذراء والعقرب"، "حنفي الأبهة"، "حارة برجوان"، "اللعب مع الشياطين"، "حلق حوش"، "هيستريا".