شذى تهاجم حسن شاكوش بسبب أغنية حماقي: لقب فنان بيتقال على كل من هب ودب

كتب- عبد الفتاح العجمي:

هاجمت المطربة شذى، الفنان حسن شاكوش، بعدما ذكر أن لحن أغنية النجم محمد حماقي "حاجة مستخبية" الذي وضعه الملحن محمد مدين، مسروقا من أغنية تركية، قبل أن يقوم هو باقتباس نفس اللحن لمهرجان "بنت الجيران" والذي قدّمه مع الفنان عمر كمال.

وكتبت شذى، عبر حسابها بموقع "فيسبوك": "لقاء حسن الشاكوش ده بالنسبالي كوميديا سوداء وهبد غير طبيعي.. كنت بضحك وعايزة أكسر التليفزيون من كمية الاستفزاز وبالأخص الجزء بتاع الرد أن حماقي أصلا سارق اللحن من أغنية تركي؟ وأساسا الأغنية التركي نازلة بعد أغنية حماقي بسنتين على الأقل! وأن أغنية حماقي من ٢٠١٢ جايبة ١٦ مليون بس!؟".

أضافت: "نقف بقى هنا.. أولا لما نجحت أغنية وسارق لحنها طيب كنت من باب العلم بالشيء ثقف نفسك واعرف تاريخ اللحن ده إيه ومين اللي واخده من مين! تاني حاجة قصدك إيه بأغنية حماقي جايبة ١٦ مليون بس إنك أجمد وكده من حماقي! ما هو مش معنى أن في هوجة وانحدار في الذوق تتخيل إنك جامد أوي وتتكلم بتعالي كإنك مغني قصيدة الأطلال!".

تابعت: "والله أمثلة بجد تكره الواحد في اليوم اللي فكر يسيب فيه حاجات كتير بيحبها علشان يخبط في العالم دي، ولقب فنان ده يتقال على كل من هب ودب وبقى مقياس النجاح وتقدير حجم الموهبة مربوط بـviews وحسابات أبعد ما تكون عن المهنية والفن.. لنا الله والله".

اقرأ أيضا| "مش حرامية".. مؤلف "حاجة مستخبية" لحماقي يرد على اتهام شاكوش لصناعها بسرقة لحنها

مطرب المهرجانات حسن شاكوش، خلال ظهوره في برنامج "الحكاية" الذي يقدمه الإعلامي عمرو أديب عبر قناة MBC مصر، علّق على اتهامه بسرقة لحن أغنية "حاجة مستخبية" للفنان محمد حماقي، واستخدامه في مهرجان "بنت الجيران"، وقال: "حماقي عامل أغنية اسمها (حاجة مستخبية)، كان بقالها 5 سنين على يوتيوب عاملة 16 مليون".

وأضاف: "قالوا إحنا سارقين لحن (حاجة مستخبية)، وحصلت مفاوضات خاصة بأرباح موقع يوتيوب بين شركتي وشركة النجم محمد حماقي، واتفقنا تتقسم أي أرباح على 3 شركات.. اللي عرفته إن (حاجة مستخبية) اللحن أصلا مسروق من لحن تركي".

أغنية "حاجة مستخبية" غناء محمد حماقي، كلمات محمد عاطف، لحن محمد مدين، توزيع أحمد إبراهيم، وطرحت في أغسطس 2014، ووصل عدد مشاهداتها عبر موقع يوتيوب إلى ما يزيد عن 115 مليون مشاهدة.

مهرجان "بنت الجيران - بهوايا أنتي قاعدة معايا"، غناء حسن شاكوش وعمر كمال، كلمات مصطفى حدوتة، وتوزيع إسلام ساسو، وتم طرحه في ديسمبر 2019.