عمرو مصطفى عن رامي صبري: بحب استفزه.. والأخير: متهزرش معايا يا لذيذ

كتبت- منى الموجي:

قال الفنان عمرو مصطفى إن المطرب رامي صبري تأثر بموسيقى أغنيته "رقصة"، مستنكرا ما نقلته بعض المواقع الصحفية من وصف الأمر بـ"السرقة".

وكتب عمرو رسالة للصحفيين عبر "فيسبوك": "أعزائي الصحفيين.. رامي صبري أول واحد باركلي هنا على الصفحة على الألبوم الجديد يمكن هو الفنان الوحيد".

وتابع "بحبه جدا كفنان وإنسان وبحب جدا (استفزه) لأنه صديق جدع وعامل ألبوم جامد كمان، بس هو تأثر بالأغنية رقصة وعادي حبيت بس أقولها (بهزار) بس عيب الصحافة تكتب سرق، في الأول والأخر ده زميل وصديق وعشرة عمر، وعادي تتوارد الأفكار بتحصل، بس دي أخر مرة يا رامي، حبيبي والله".

وكتب رامي صبري تعليقا على منشور عمرو "هزر براحتك يا عمرو.. بس أغنيتي يمكن خير دي أنا ملحنها من 2009، وانت عارف إن رامي صبري مستحيل ياخد لحن مش لحنه وينسبه لنفسه، وتاريخي وجمهوري المحترم يعرف الكلام ده.. مابالك انت بقى. حصل خير وبعد كده متهزرش معايا علشان أنا مبحبش النوع ده من الهزار يا لذيذ".

كان عمرو كتب أمس عبر فيسبوك: "لما تسمع أغنية (رقصة) وتلاقي زميل سرقها وبطيء الدخول وكتب عليه كلام وكتب ألحانه"، لتأتي التعليقات وتشير إلى التشابه بين "رقصة" وأغنية رامي صبري "يمكن خير".