"بحب أسمع مصطفى حسني واعتزالي من عند ربنا".. أبرز تصريحات زيزي عادل في"كلام الناس"

كتب- هاني صابر:

كشفت الفنانة المعتزلة زيزي عادل، خلال لقائها مع المذيعة ياسمين عز ببرنامج "كلام الناس" المعروض على قناة MBC مصر، تفاصيل عديدة حول مشاركتها ببرنامج "ستار أكاديمي"، وحقيقة ارتداء الحجاب واعتزال الفن والتحولات التي حدثت في حياتها وأدت لابتعادها عن الغناء لفترة.

نستعرض لكم أبرز تصريحات زيزي عادل في "كلام الناس" في السطور التالية:

- "معرفش ليه عايزني أتجوز يمكن تبقى بشرة خير".

- "اعتزالي مالوش علاقة بجواز ولا ارتباط، وجه من عند ربنا، ربنا قالي سيبي وخلاص، حاجة بتحصل مينفعش تتوصف، كإن ربنا بيقولك كفاية لعبنا وهزرنا وخلصنا خلينا نعمل للي جاي".

- "لما بتعتزلي عشان حد أو تتحجبي عشان حد عن عدم اقتناع بتلاقي الجوازة باظت ونرجع نمثل ونقلع الحجاب".

- بحب أسمع لـ مصطفى حسني وعاملاله متابعة من قبل ما أعتزل، ولما قابلته شخصيا ارتحت.

- اعتزلت لأني اكتشفت إني هاخد معايا أعمالي وبدأت أفكر إني مش مستعدة أقابل ربنا بـ حياة المطربة.

- "بصراحة لو رجع بيا الزمن أكيد مكنتش هروح ستار أكاديمي، عشان قراراتي دلوقتي وتغيير فكري وتقربي من ربنا يخليني أقول يا ريتني معملتهاش، بس أنا مش بندم لإن كل حاجة لها ترتيب ولسبب معين".

- "ستار أكاديمي تجربتي بداية النجاح والانطلاقة، بعد البرنامج نزلت لقيت نفسي مشهورة مع إن مكانش عندي أغاني ولا ألبومات بس مشهورة كإني بقالي 10 سنين بغني، مصدقتش استقبال الناس في المطار لأن هناك مفيش تليفزيون ولا كان معايا موبايل مكنتش أعرف إيه اللي بيحصل برة، بعد ما بتطلعي بيحصل صدمة انك مشهورة ومعروفة".

- "في كل حتة كان فيه كاميرا بالبرنامج، والحمامات كان فيها كاميرات، بس مش في التواليت نفسه، لكن أمام الأحواض والمرايات، وانتي بتغسلي إيدك ووشك فيه كاميرات، ودي حاجة شوية بتضايق، وأول كام يوم كنت حاسة اني متراقبة".

- ردت على سؤال عن رأي الداعية مصطفى حسني في الغناء وهل قال إنه حرام أو حلال، قائلة: "أهي دي الأسئلة الصعبة، خلينا متفقين إن في أسس علشان انتي مغنية لازم تعمليها، في كذا حاجة بتحصل غلط، علشان أقول كلام حب أو هجر فيه تحريك للمشاعر ودا كله حرام "الفكرة كلها على بعضها حرام".

- "لما أطلع على الاستيدج لازم ألبس فستان وأتحرك مع المزيكا أكيد مش هقف تمثال، وكان فيه حاجة بتضايقني جدًا في الحفلات مش عندي قدرة ألغيها وأنها إن اللي حاضر بيصورني من زوايا زي ما هو عاوز وبيجيب من الحتة اللي عاوزاها ومش عندي الحق أقول له ما تصورش".

- "أنا معرضة إني أتصور على كل موبايلات الناس، بتصور من زواية اللي هو يختارها، وبيزوم من الحتة اللي هو عايزها، أنا معرضه إني اتصور على كل تليفونات الناس، وبعدين تروح تفرج صاحبك عليا".

- "سألت نفسي.. ليه أكون متاحة لكل الناس وعلى كل التليفونات، ليه ماكنش ست قاعدة في بيتي مش متاحة لكل الناس".

- الناس فاكرة إني اتحجبت ولكن ده كان سوء فهم لأن آخر حاجة قدمتها كان ألبوم ديني اسمه "سيبها على الله" وكنت لابسة حجاب فيه.