"الحزن على الأخ وجع غريب".. مجدي الهواري يوجه رسالة مؤثرة لشقيقه

كتب - هاني صابر:

حرص المخرج مجدي الهواري، على توجيه رسالة رثاء لشقيقه الراحل جمال الهواري، الذي وافته المنية يوم الإثنين الماضي.

وكتب الهواري، عبر حسابه على "فيسبوك": "مفيش كلام يعبر عن الحالة دلوقتي، حد يخترع حروف جنب بعضها تقول كلمة توصف الإحساس ده، حالة حزن وألم ديه، عارف لما تبقى عايز تقول آه من وجع فيه وجع، مش زي إياه! اللي عارفينه كلنا لأ، مش وجع من حاجة وجعاك بردو لأ".

وتابع: "وجع من حاجة ملهاش ماسكة كده.. علشان تدوس عليه فتوجعك حتى أكتر.. فتمسكها وتحسسك إنك حتى عرفت مكانها فين.. فتفصح عنه وعنها.. فيقولك دكتورك علاجها إيه مثلًا أي برشامة ولا حقنة واضرب منها شريط حتى!.. طب وحتى لو ملهاش علاج .. عادي.. بس أهو عادي".

واستكمل: "يمكن لما تقول لحد مكانها وتخرج اللي جواك يمكن تخفف الوجع عنك شوية، طب ما أنا بخرج أهو، ولا أية حاجة، ماله الحزن والألم العادي بس، ما إحنا ياما حزنا وتأثرنا.. مكنش يبقى هو وخلاص، طب نقول يا ريت يبقى من الوجع العادي، ولا أية حاجة".

وأوضح: "بس الحقيقة الحزن على الأخ بيجيب معاه وجع غريب مشروط كده بالطول في الواحد ومتساب في الهوا وهو عريان كمان.. كل ما الهوا يفتكروه أو يشوف صورته أو يسمع صوته أو يفتكر ضحكته وطيبته.. يرجع تاني يقول آه من الوجع ، ولما حد يسألك إيه !! فين بيوجعك! تقوله معرفش!.. طب أوصف الوجع ! تقوله معرفش!".

وأضاف: "طب إيه اللي بيوجعك! تقوله فراق أخويا وبس.. ربنا ما يعديه على حد النوع ده من الوجع.. دعوة من حد موجوع هنا".

وكان المخرج مجدي الهواري قد أعلن عن وفاة شقيقه "جمال" مساء الإثنين الماضي، وكتب عبر فيسبوك: "هكتب كتير فيك يا غالي يا ابن الغاليين بس بعد ما ناخد عزاك، إنا لله وإنا إليه راجعون، توفي إلى رحمة الله أخويا الغالي جمال الهواري، الأخ والصديق والأب والحبيب، كسرت قلبي يا جمال.. بكاء وحزن كتير، ربي ارحمه واغفر له واسكنه فسيح جناتك".