رأيها بتجسيد حياتها وتحب هؤلاء من الجيل الجديد.. تصريحات شويكار لـ"الحرة"
شويكار
تطبيق مصراوي
لرؤيــــه أصدق للأحــــداث
كتب- هاني صابر:
حلت الفنانة شويكار ضيفة قبل 9 أعوام على قناة الحرة؛ لتتحدث عن مشوارها الفني، ورأيها في الأعمال الفنية المعروضة وقتها، ويعد هذا اللقاء من أواخر الحوارات التليفزيونية التي أجرتها قبل أن تختار لنفسها العزلة، وتكتفي بين وقت وآخر بالحديث عبر الهاتف، لطمأنة محبيها عليها عبر البرامج المختلفة.
ونستعرض في السطور التالية أبرز ما جاء على لسانها في الحوار..
- كان من المقرر أن تشارك في مسلسل أهل الهوى، وعنه قالت "كان فيه عمل اتوقف قبل يناير ٢٠١١ للأستاذ محفوظ عبدالرحمن اسمه (أهل الهوى) عن قصة بيرم التونسي، وكان من المقرر أن أجسد من خلاله دور ملك وهو دور من الأدوار الجيدة.
- أنا لو عملت حاجة في الدراما لازم يكون عمل كبير، وحاجة متكلفة ومخرجه كويس والعمل مكتوب حلو.
- أشادت بمسلسل "رجل من هذا الزمان" للمخرجة إنعام محمد علي، وقالت عنه "شيء ما اتوصفش".
- جمال عبدالحميد من المخرجين المميزين أوي، وأنا بحبه أوي.
- مسلسل الشحرورة.. لم يبسطني، والفنانة صباح أكبر من المسلسل بكتير وأعظم وأهم من اللي اتكتب بكتير.
- أنا مليش حياة تتمثل.. البني آدم اللي يقدر يكتب قصة حياته، لازم تكون مؤثرة وفيها صعوبات وتعب وفحت وغلب من الأب وهروب من الأم، لازم يكون فيها كفاح وأنا معنديش الكفاح ده أعملها ليه، أنا واحدة عندها أهل بيحترموا الفن، وبيقدروا الفن وبيحسوا إن البلد من غير فن، متبقاش.. أنا أهلي كدا، وهما ناس كلهم متعلمين بره وفاهمة يعني إيه رقي.
- أنا أول ما قلت عايزة أشتغل الدنيا كلها شغلتني ومحتاجتش إني أحفر الحجر والكلام ده خالص.
- وصولي للشهرة لأني موهبة وذكية في شغلي ومثقفة.
- من أشد المعجبين بالمخرج خالد يوسف فكريًا وثقافيًا وأخلاقيًا، وذات مرة قالي "فيه دور مش قيمتك بس عايزك"، فقولتله "يا ريت".. روحت واشتغلت عشان أشوفه بيفكر إزاي وبيعمل إيه؟.
- كنت حاسة بغربة في العمل الذي جمعني بخالد يوسف؛ لأنه كان فيه جيل جديد، ومفيش حد من اللي بعرفهم موجود.
- الجيل الجديد من الممثلين.. شايفة إنه موهوب ومثقف وزكي وجريء أكتر من الأجيال اللي فاتت، وبستغرب أحيانا إزاي إحساسهم كدا وهما صغيرين.
- أيامنا مكناش بنخرج من البيت، عشان نوحش الناس مع إن مكنش فيه تليفزيون على أيامنا، ومكناش بنخرج عشان نقعد أكبر فترة ممكنة، عشان الناس متشبعش مننا، ودلوقتي بقى العمل بيتعرض على ١٧ محطة، والناس بقت بتشبع من الفنانين من كتر ما بتشوفهم، والناس اللي بتعمل كل سنة مسلسل في رمضان، الناس شبعت منهم.
- بحب من الجيل الجديد منى زكي ومنة شلبي وغادة عادل وسمية الخشاب ونيللي كريم وأحمد السقا وكريم عبدالعزيز ومصطفى شعبان ويوسف الشريف وأحمد عز وآسر ياسين وعمرو سعد، كلهم كويسين جدًا جدًا.
- بحب في الكوميديا، دنيا سمير غانم؛ لأنها فنانة شاملة.
- الممثلة عشان تكون كوميديانة، لازم يكون دمها خفيف، وسهل جدًا إنها تمثل أي دور.
- شويكار وفؤاد المهندس أعمالهم عايشة لحد دلوقتي عشان إحنا احترمنا نفسنا، واحترمنا الناس اللي حبونا، وقدمنا حاجة محترمة.. ومفيش ولا ضربة بالأيدي ولا قلة أدب ولا شتيمة بالأم.
- عملت كل حاجة في السينما ومفيش حاجة بتمنى أقدمها ومش عايزة أعمل حاجة، ومش بفكر.
- اشتغلت مع هند رستم فيلم واحد فقط وهو "اعترافات زوج"، والعمل ده ضم مجموعة كبيرة من الكبار، وكلهم كوكبة ملهاش زي الحقيقة، الله يرحمهم.
- بتمنى السلام لكل الدنيا، وبتمنى الحب اللي ناقصنا إنه يعم على الدنيا كلها، وعلى المستوى الشخصي بتمنى الستر والصحة.
شويكار توفيت عصر اليوم الجمعة 14 أغسطس، ومن المقرر تشييع جثمانها غدًا السبت، ودفنها في مقابر أسرتها بمدينة السادس من أكتوبر.
تابع تغطية مصراوي لوفاة الفنانة شويكار.. اضغط هنا
فيديو قد يعجبك:
