سالي عبدالسلام تتضامن مع "فتاة التجمع": "اترفدت من شغلها"

كتبت- سما جابر:

تضامنت الإعلامية سالي عبدالسلام مع منّة جبران، التي عُرفت مؤخرًا بلقب "فتاة التجمع".

ونشرت سالي عبر حسابها على موقع "إنستجرام"، صورة تجمعها بمنّة كشفت فيها عن معاناتها في عملها ومع أسرتها وأصدقائها.

وكتبت "عبدالسلام": "مع منة جبران اللي اكتشفت إنها بنت منطقتي، أجدع بنت في مصر، عيدي واخرجي واتبسطي.. انتي الصح! انتي على حق.. منة اترفدت من شغلها، عيلتها قالت لها اسكتي وفي منهم قاطعها وهي يتيمة الأب.. أعز صاحبة ليها قالتلها امسحي صوري من عندك وقاطعتها!! منة مامتها منعتها من الخروج وأنا استأذنتها تنزل معايا".

وأضافت: "بعد الفيديو اللي متحرش فيه مشيت منه ودخلت سوبر ماركت وفضل واقف وفي الآخر نزل كلمها يقول لها تعالي نشرب كوفي!! وكأنه عادي في بلدنا أى حد يكلمني وأنا ماشية لوحدي! ولما صورته ونزلت الفيديو للأسف بنات دافعت عنه عشان عربيته غالية وأشباه رجال بيقولوا مشتمهاش أو قال لها حاجة خارجة!.. للأسف نسينا الأخلاق!! عاداتنا وتقاليدنا على أهل بيتنا بس!.. يقولك أمي وأختي لا! وإحنا عادى ملناش حق ولا حرية نعيش في أمان!".

وتابعت: "الساكت عن الحق شيطان أخرس! اجبروا بخاطر الناس ربنا يجبر بخاطركم! الخير فينا إلى يوم الدين!.. والله ما عرفت أعيد بسبب تعبي والخبر في صحتي اللي نكد عليا، بس مش هسيب حد مظلوم يتحول لجاني.. الله الغني عن شهرة وفولورز مش بيقولوا ولا بينصروا الحق!.. كنت اشتريت من زمان أحسن متابعين!.. الله الغني عن حد هيأذيني بعد كدة!".

واختتمت سالي عبدالسلام قائلة: "من فضلك متقولش رأيك إلا لما تقيس موقف على أهل بيتك!.. المتحرش القذر في ناس في المجتمع عملته نجم وبيعمل فيديوهات وبيسف على الموضوع.. لو انتى تقبلي تنزلي مع حد متعرفيهوش إحنا لا.. في بنات اتربت وجدعة وبـ100 ست من الساهلين الرخاص اللي بيدافعوا عن باطل وعايزين يرخصونا كلنا.. حسبي الله ونعم الوكيل!".