إلهام شاهين تحكي لـ"مصراوي" موقفاً إنسانياً جمعها بشادية

كتبت- منى الموجي:

قالت الفنانة إلهام شاهين إن علاقتها بالفنانة شادية بدأت مع فيلم "لا تسألني من أنا"، وهو العمل السينمائي الأخير في مشوار الراحلة.

وأضافت في تصريحات خاصة لـ"مصراوي": "كانت علاقتي بشادية علاقة بنت بأمها، كنت بعتبر نفسي تلميذتها، أنا وجه جديد وهي نجمة كبيرة، وكانت بتغير مواعيد التصوير عشان تراعي إن عندي امتحانات، لأني وجه جديد والمخرج عايز يصور لكن لما يكون تغيير الاوردرات منها لن يُعارض، وتقول إن هي اللي هتيجي متأخر وعندها ظروف".

وتابعت "كانت بتتعامل على اننا أولادها بجد مش أولادها في التمثيل، لأنها كانت بتتعايش مع الشخصية جدا، وكانت على درجة عالية من الإنسانية، ماكنتش بعمل مجهود في مشاهد البكاء لأن الحنان اللي في حضنها يخللي أي حد دموعه تنزل، كانت طيبة أوي وتحب شغلها وبلدها أوي وكان جواها خير رهيب يكفي الدنيا كلها".

شادية رحلت عن عالمنا مساء اليوم الثلاثاء بعد صراع مع المرض عن عمر يناهز ٨٦ عاما.