كبسولة رمضانية عن: الفرحة

كتب - أحمد حمدى :

أول يوم رمضان، أنا لسه فاكر رمضان السنة اللى فاتت كأنه لسه من شهر. رجعت أيام السحور والصحيان على الفجر تانى، وطبعا طبق الفول الأكله الرسمية لرمضان.

نفس إحساس العطش والجوع بتوع أول يوم دائما بيتكرروا، ودائما يوميها ما بأسمعش حاجة أحلى من أذان المغرب، فعلا يا رسول الله فرحة آذان المغرب لا تنتهى "للصائم فرحتان، عند فطوره ويوم يلقى الله" كل يوم نفس أحساس الفرح بيجى مع الأذان، لحظة الفطار من اللحظات اللى بتبقى عارف انك هتفرح فيها.

تخيل لما دى تبقى فرحة الدنيا فما بالك بفرحة الأخرة وأنت بتشوف أعمالك وثواب الصيام العظيم. يا رب زى ما فرحتنا مع كل أذان مغرب فى الدنيا ما تحرمناش فرحة ثواب الصيام فى الأخرة. اللهم أصلح حالنا فى رمضان وأجعله منا متقبلا.